សន្តិសុខសង្គម

ឆេះរថយន្តមួយគ្រឿង ដែលកំពុងបើកបរនៅលើផ្លូវជាតិ ដោយមិនទាន់ដឹងមូលហេតុ

បានផុស

២ ខែ មុន

នៅ

ថ្ងៃអាទិត្យ ២១ មេសា ២០២៤

ដោយ

រថយន្តប្រភេទ តូយ៉ូតា camry មួយគ្រឿង ត្រូវបានអគ្គិភ័យឆាបឆេះស្ទើរទាំងស្រុង បើទោះបីជាមានការព្យាយាមទប់ស្កាត់ពីក្រុមបង្ការពន្លត់អគ្គិភ័យយ៉ាងណាក៏ដោយ ដោយសារតែការឆាបឆេះនេះហាក់ដូចជាលឿនពេក ហើយក៏មិនទាន់ដឹងអំពីមូលហេតុ នៃការឆាបឆេះនេះនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីបង្កឲ្យមានការភ្ញាក់ផ្អើលនេះ បានកើតឡើង កាលពីថ្ងៃទី ២០ ខែមេសា ឆ្នាំ ២០២៤ វេលាម៉ោងប្រហែល ១១ យប់ នៅត្រង់ចំណុចក្រុមទី ៣ ភូមិព្រៃកូនសេក សង្កាត់អូរចារ ក្រុងបាត់ដំបង បណ្ដាលឲ្យឆេះរថយន្តចំនួន ១ គ្រឿង។

បើតាមប្រភពពីប្រជាពលរដ្ឋដែលនៅក្បែរទីតាំងកើតហេតុបានបញ្ជាក់ថា នៅមុនពេលកើតហេតុមានរថយន្តមួយគ្រឿង ម៉ាក TOYOTA Camry ពណ៌ស ពាក់ស្លាកលេខ ភ្នំពេញ 2E-9282 គឺកំពុងធ្វើដំណើរយ៉ាងលឿននៅតាមបណ្ដោយផ្លូវវាងក្រុង ភ្លាមៗនោះដែរ ក៏ស្រាប់តែមានអណ្ដាតភ្លើងបានឆាបឆេះហុយផ្សែងទ្រលោមចេញពីផ្នែកខាងមុខ នៃរថយន្ត ហើយអណ្ដាតភ្លើងនេះក៏បានឆាបឆេះយ៉ាងលឿនបំផុត ដោយនៅពេលនោះដែរ អ្នកបើកបររថយន្តបានបើកទ្វាររត់គេចខ្លួនបាត់ស្រមោលទាំងយប់។

បន្ទាប់ពីទទួលបានដំណឹងនេះភ្លាម កម្លាំងការិយាល័យបង្ការពន្លត់អគ្គិភ័យ នៃស្នងការដ្ឋាននគរបាលខេត្តបាត់ដំបង បានចេញរថយន្ត ដើម្បីជួយអន្តរាគមន៍បាញ់ពន្លត់។ តែទោះបីជាយ៉ាងណាក៏ដោយ ក៏រថយន្តនេះត្រូវបានអណ្ដាតភ្លើងឆាបឆេះស្ទើរទាំងស្រុងទៅហើយ ដែលរហូតដល់ពេលនេះដែរ សមត្ថកិច្ចនៅមិនទាន់បង្ហាញថា តើការឆាបឆេះនេះមូលហេតុបណ្ដាលមកពីអ្វីនោះដែរ៕

អត្ថបទ ៖ សោនិយមរ័ត្ន