អាជ្ញាធរ ចុះរៀបចំសណ្តាប់ធ្នាប់ក្រោមស្ពានស្ទឹងមានជ័យ ដែលជាជម្រកជនអនាថាប្រព្រឹត្តបទល្មើស

គណៈបញ្ជាការឯកភាពខណ្ឌមានជ័យ ដឹកនាំដោយ លោក កែវ សំណាង អភិបាលរង​ នៅថ្ងៃទី២០ ខែ កក្កដា ឆ្នាំ២០២៤ បានចុះរៀបចំសណ្តាប់ធ្នាប់នៅក្រោមស្ពានស្ទឹងមានជ័យ ក្រោយជនអនាថាមួយចំនួនបានយកទីតាំងនោះធ្វើជាជម្រកសម្រាប់ប្រើប្រាស់គ្រឿងញៀន ដែលធ្វើឱ្យប៉ះពាល់ដល់សន្តិសុខ និងសណ្តាប់ធ្នាប់សង្គម។

ការចុះរៀបចំសណ្តាប់ធ្នាប់នេះ បន្ទាប់ពីសង្កេតឃើញថា ពីមួយថ្ងៃទៅមួយថ្ងៃជនអនាថាបានប្រមូលផ្តុំគ្នានៅក្រោមស្ពានស្ទឹងមានជ័យ ស្ថិតនៅសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ និងឆ្លៀតឱកាសសាងសង់ធ្វើខ្ទមតូចៗដើម្បីស្នាក់នៅ និងប្រើប្រាស់គ្រឿងញៀនផងដែរ។ បន្ថែមពីនេះ ជារឿយៗពលរដ្ឋដែលធ្វើដំណើរឆ្លងកាត់នៅម្តុំនោះបានសម្តែងការព្រួយបារម្ភពីសុវត្ថិភាពរាល់ពេលធ្វើដំណើរឆ្លងកាត់ពេលយប់អាធ្រាត្រដោយបារម្ភពីករណីចោរឆ្លក់ ឬប្លន់ជាដើម។

លោក កែវ សំណាង អភិបាលរងខណ្ឌមានជ័យ មានប្រសាសន៍ថា ជារឿយៗអាជ្ញាធរតែងតែចុះរៀបចំសណ្តាប់ធ្នាប់នៅទីនេះ ដើម្បីលើកកម្ពស់សោភណ្ឌភាពទីក្រុង ជាពិសេសពង្រឹងសន្តិសុខ។ លោកថ្លែងថា៖«អាជ្ញាធរមូលដ្ឋាន តែងតែចុះរៀបចំសណ្តាប់ធ្នាប់ធ្នាប់និងប្រមូលក្រុមជនអនាថាក្រោមស្ពាន និងរុះរើតូបតូចៗ ដុតកម្ទេចចោល ចៀសវាងក្រុមទាំងនោះមកសាងសង់ធ្វើកន្លែងសាក់នៅម្ដងទៀត»។

លោកបញ្ជាក់បន្ថែមថា វិធានការណ៍នេះ ស្របទៅនឹងការអនុវត្តន៍គោលនយោបាយ «ភូមិ-ឃុំ-សង្កាត់ មានសុវត្ថិភាព» ដើម្បីរួមចំណែកយ៉ាងសំខាន់ ក្នុងការដោះស្រាយទុក្ខលំបាក ប្រកបដោយភាពវិជ្ជមាន និងក្តីកង្វល់ផ្សេងៗរបស់ប្រជាពលរដ្ឋក្នុងមូលដ្ឋាន។  ជាពិសេស លើកកម្ពស់បន្ថែមទៀតនូវសណ្តាប់ធ្នាប់សាធារណៈ និងធានារក្សាបាននូវសន្តិសុខសង្គម ស្ថិរភាពនយោបាយ និងនិរន្តរភាពបានកាន់តែល្អប្រសើរ ៕
អត្ថបទ៖ ម៉េង