របងវិទ្យាល័យសន្ធរម៉ុក ក្លាយជាចំណតរថយន្ត យ៉ាងអនាធិបតេយ្យ

របងសាលាវិទ្យាល័យសន្ធរម៉ុក តាមបណ្ដោយមហាវិថីកម្ពុជាក្រោម ក្នុងសង្កាត់ទឹកល្អទី១ ខណ្ឌទួលគោក បានក្លាយជាចំណតរថយន្តឈប់ចតយ៉ាងអនាធិបតេយ្យ ធ្វើអោយសិស្សានុសិស្សគ្មានផ្លូវដើរថ្មើរជើង។

តាមការលើកឡើងរបស់ពលរដ្ឋដែលរស់នៅតំបន់នោះគឺលោក សម្ផស្ស បានលើកឡើងថា ចំពោះការចតរថយន្តនេះ គឺតែងតែមានការចតជាប្រចាំថ្ងៃតែម្តង។ លោកបន្តទៀតថា អាជ្ញាធរបានចុះមករៀបចំសណ្តាប់ធ្នាប់ម្តងម្កាលដែរ ប៉ុន្តែរៀបចំមិនបានប៉ុន្មានថ្ងៃផង ក៏មានរថយន្តមកចតជាធម្មតាឡើងវិញ ដោយភាគច្រើនមិនមែនជាពលរដ្ឋរស់នៅក្នុងមូលដ្ឋាននេះឡើយ ច្រើនជាភ្ញៀវដែលបានមកចូលហាងលក់កុំព្យូទ័រ និងចូលបណ្ណាគារ ហើយមួយចំនួនទៀតយករបងសាលាចតរថយន្តចាប់តាំងពីព្រឹករហូតដល់ល្ងាចតែម្តង។

ពាក់ព័ន្ធបញ្ហានេះ លោក សុឹប សុផង់ អភិបាលរងខណ្ឌទួលគោកបានប្រាប់អោយដឹងថា រដ្ឋបាលខណ្ឌទួលគោក តែងតែចុះរៀបចំសណ្ដាប់ធ្នាប់នៅលើចិញ្ចើមផ្លូវសម្រាប់អ្នកថ្មើរជើងជុំវិញសាលាវិទ្យាល័យសន្ធរម៉ុកជានិច្ច។ ប៉ុន្តែនៅពេលធ្វើការដេញប្រជាពលរដ្ឋបានយករថយន្តចេញទៅ ខណៈកម្លាំងចេញផុតបានបន្តិច ក៏យកមកចតវិញដដែល។

លោកអភិបាលរងបានបន្តទៀតថា ប្រសិនជាប្រជាពលរដ្ឋនៅតែបន្តចតនោះអាជ្ញាធរនឹងមានវិធានការក្តៅ ចាក់ទម្លុះកង់ ឬក៏ស្ទូចយករថយន្តទៅរក្សាទុកនៅអធិការដ្ឋាននគរបាលខណ្ឌដើម្បីចាត់ការតាមនីតិវិធី។

បន្ថែមពីនេះ ប្រជាពលរដ្ឋសំណូមពរអាជ្ញាធរមេត្តាយកចិត្តទុកដាក់ចំពោះបញ្ហាយករបងសាលាចតរថយន្តនេះឡើងវិញ ព្រោះធ្វើអោយសិស្សានុសិស្សមិនមានផ្លូវសម្រាប់ថ្មើរជើងនោះឡើយ ដោយសារតែមានរថយន្តចតពេញចិញ្ចើមផ្លូវ ធ្វើអោយសិស្សដើរលើផ្លូវសិទ្ធិអាទិភាពសម្រាប់យានយន្តងាយនឹងគ្រោះថ្នាក់គ្រប់ពេល៕

អត្ថបទ៖ ម៉េង