រដ្ឋបាលខណ្ឌបឹងកេងកង បន្តយុទ្ធនាការបាញ់ថ្នាំសម្លាប់មូសជូនពលរដ្ឋក្នុងមូលដ្ឋាន

ក្រុមការងាររដ្ឋបាលខណ្ឌបឹងកេងកង ដឹកនាំដោយលោក សុខ សម្បត្តិ អភិបាលខណ្ឌ រួមជាមួយមន្រ្តីក្រោមឱវាទចុះបាញ់ថ្នាំកម្ចាត់មូស នៅតាមបណ្តោយផ្លូវ ១០៥ កែង មហាវិថី ម៉ៅសេទុង រហូតទៅដល់ វិទ្យាល័យ ព្រះយុគន្ធ ដើម្បីបង្ការការពារជំងឺគ្រុនឈាមជូនពលរដ្ឋរស់នៅក្នុងមូលដ្ឋាន។

លោក សុខ សម្បត្តិអភិបាលខណ្ឌបឹងកេងកង បានអោយដឹងថា ដោយអនុវត្តន៍តាមបទបញ្ជាលោក ឃួង ស្រេង អភិបាលនៃគណៈអភិបាលរាជធានីភ្នំពេញ លើការយកចិត្តទុកដាក់ពីសុខមាលភាពប្រជាពលរដ្ឋ និងដោយយោងទៅលើស្ថានភាពជាក់ស្ដែង នៃការរីករាលដាលជំងឺគ្រុនឈាមមានការកើនឡើង លោកបានដឹកនាំរដ្ឋបាលខណ្ឌបឹងកេងកង ចុះបាញ់ថ្នាំសម្លាប់មូស ប្រយុទ្ធប្រឆាំងជំងឺគ្រុនឈាមនៅតាមសង្កាត់ ទូទាំងមូលដ្ឋានខណ្ឌបឹងកេងកងតែម្តង។

ជាមួយគ្នានេះ លោក សុខ សម្បត្តិ អភិបាលខណ្ឌ បានអំពាវនាវឲ្យប្រជាពលរដ្ឋរស់នៅក្នុងមូលដ្ឋាន ចូលរួមលុបបំបាត់ជម្រកមូសខ្លា ដូចជាលុបបំបាត់ទឹកដក់ជាជម្រកមូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀងជាជម្រកមូសខ្លា)។ ដើម្បីរួមគ្នាលុបបំបាត់ជម្រកមូសខ្លា នៅក្នុងសហគមន៍របស់យើង នឹងរួមចំណែកទុបស្កាត់ការចម្លងជំងឺគ្រុនឈាម៕

អត្ថបទ៖ រដ្ឋា