សមត្ថកិច្ចខេត្តក្រចេះ ចុះបង្ក្រាបអាជីវកម្មរ៉ែមាសខុសច្បាប់ ២ កន្លែង និងតម្រូវឲ្យធ្វើកិច្ចសន្យាបញ្ឈប់សកម្មភាពជាបន្ទាន់

មន្ត្រីជំនាញ​នៃមន្ទីរ៉ែ និង​ថាមពល​ខេត្តក្រចេះ ចុះ​បង្ក្រាប​ទីតាំង​ធ្វើអាជីវកម្មរ៉ែមាសខុស​ច្បាប់ ចំនួន ២ កន្លែង ដោយ​តម្រូវ​ឲ្យ​ធ្វើកិច្ច​សន្យា​ផ្អាកសកម្មភាពនៃការរុករក​ជា​បន្ទាន់។

ប្រតិបត្តិការបង្ក្រាបនេះ ធ្វើឡើងនៅព្រឹកថ្ងៃទី២៤ ខែកុម្ភៈ ឆ្នាំ ២០២៥ មន្ត្រីជំនាញ​នៃ​មន្ទី​រ៉ែ​ខេត្ត បានសហការ​ជាមួយ​កម្លាំង​ស្នងការដ្ឋាន​នគរបាល​ខេត្តក្រចេះ ចុះបង្ក្រាបនៅចំណុច​អូត្រូន ស្ថិត​នៅក្នុងភូមិអូពោរ ឃុំក្បាលដំរី ស្រុក​អូគ្រៀង​សែនជ័យ ខេត្តក្រចេះ ។

លោក រត្ន័ តុលា ប្រធាន​មន្ទីររ៉ែ និង​ថាមពល​ខេត្ត​​ក្រចេះ បានឲ្យ​ដឹងថា ប្រតិបត្តិការបង្ក្រាបនេះ មន្ត្រី​ជំនាញ​បាន​ សហការ​​ជាមួយកម្លាំងអធិការដ្ឋាន​នគរបាល​ស្រុក​អូរគ្រៀង​សែនជ័យ និងកម្លាំងនគរបាល​សេដ្ឋកិច្ចនៃ​ស្នងការដ្ឋាននគរ​បាលខេត្តក្រចេះ ដោយ​បានបង្ក្រាបទីតាំងអាជីវកម្មរ៉ែមាសចំនួន ២ ដែល​កំពុងធ្វើ​សកម្មភាពនៃកា រុករករ៉ែមាសខុសច្បាប់។

លោក​ប្រធានមន្ទីរ​បាន​បញ្ជាក់ថា ការចុះបង្ក្រាបនេះ កម្លាំងសមត្ថកិច្ច​ពាក់ព័ន្ធមិន​បាន​ដកហូត​យក​ឧបករណ៍សម្ភារៈ អ្វីនោះទេ​ដោយគ្រាន់​តែហៅម្ចាស់​ទីតាំង​ទាំង ២ នោះមកធ្វើកិច្ចសន្យា​ហើយបញ្ឈប់សកម្មភាពជាបន្ទាន់ ប្រសិនបើនៅ​តែបន្តសកម្មភាព​ទៀតអាជ្ញាធរ និង​សមត្ថកិច្ច​ជំនាញ​នឹង​ចាត់វិធាន​ផ្លូវច្បាប់ ៕

អត្ថបទ៖ ប្រុញ វិធិន