សន្តិសុខសង្គម

បញ្ជូនខ្លួនក្មេងទំនើង ០៨ នាក់ ពាក់ព័ន្ធករណីហិង្សាដោយចេតនា ទៅកាន់តុលាការ

បានផុស

២៨ វិនាទី មុន

នៅ

ថ្ងៃចន្ទ ២១ មេសា ២០២៥

ដោយ

អាវុធហត្ថរាជធានីភ្នំពេញ បញ្ជូនខ្លួនក្មេងទំនើងប្រុស-ស្រី ចំនួន ០២ ក្រុម សរុប ០៨ នាក់ ប្រដាប់ដោយដុំថ្ម ដុំឥដ្ឋ សម្បកកង់ម៉ូតូ និង ដំបង ដែលបានធ្វើសកម្មភាពគប់គ្នាទៅវិញទៅមក បណ្ដាលឲ្យជនរងគ្រោះ ០១ នាក់ ត្រូវនឹងដុំថ្មចំក្បាលរងរបួស សន្លប់បាត់បង់ស្មារតី ទៅកាន់តុលាការ ពាក់ព័ន្ធករណីហិង្សាដោយចេតនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីហិង្សានេះបានកើតឡើងកាលពីវេលាម៉ោង ០៤ និង ៥០ នាទី ថ្ងៃទី ១៨ ខែមេសា ឆ្នាំ ២០២៥ ថ្មីៗ នេះ នៅចំណុចផ្លូវដីថ្មី ភូមិដំណាក់ធំ ០២ សង្កាត់ស្ទឹងមានជ័យ ០៣ ខណ្ឌមានជ័យ រាជធានីភ្នំពេញ។

ហេតុការណ៍នេះដែរ បន្ទាប់ពីទទួលបានព័ត៌មាន កម្លាំងជំនាញមូលដ្ឋានអាវុធហត្ថខណ្ឌមានជ័យ បានចុះដល់កន្លែងកើតហេតុធ្វើការឃាត់ខ្លួនជាក់ស្ដែងលើក្រុមក្មេងទំនើងទាំង ០២ ក្រុម សរុបបានចំនួន ០៦ នាក់ (ប្រុស ០៣ នាក់ ស្រី ០៣ នាក់)។ រហូតដល់ម៉ោងប្រមាណ ១២ និង ២៥ នាទី ថ្ងៃខែឆ្នាំដដែល កម្លាំងអាវុធហត្ថខណ្ឌមានជ័យ បន្តសហការជាមួយកម្លាំងការិយាល័យព្រហ្មទណ្ឌ កងរាជអាវុធហត្ថរាជធានីភ្នំពេញ បានឈានទៅឃាត់ខ្លួនជនសង្ស័យចំនួន ០២ នាក់ទៀត។ ក្មេងទំនើងទាំង ០៨ នាក់ (ប្រុស ០៥ នាក់ ស្រី ០៣ នាក់) ត្រូវបានបញ្ជូនបន្តទៅការិយាល័យព្រហ្មទណ្ឌ កងរាជអាវុធហត្ថរាជធានីភ្នំពេញ ដើម្បីចាត់ការបន្តតាមនីតិវិធី។ ចំណែកវត្ថុតាងចាប់យករួមមាន ៖ ម៉ូតូ ០២ គ្រឿង ដុំថ្មមួយចំនួន និងសម្ភារៈមួយចំនួនទៀត។ ក្រោមវិធានការជំនាញ ក្មេងទំនើងទាំង ០៨ នាក់ បានសារភាពឲ្យដឹងដូចៗ គ្នាថា ពួកខ្លួនពិតជាបានពាក់ព័ន្ធក្នុងអំពើហិង្សាវាយតប់គ្នាទៅវិញទៅមកដូចការរៀបរាប់ខាងលើប្រាកដមែន។

បច្ចុប្បន្ន ក្មេងទំនើងប្រុស-ស្រី ទាំង ០៨ នាក់ ត្រូវបានកម្លាំងជំនាញការិយាល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសំណុំរឿងបញ្ជូនទៅកាន់តុលាការ ដើម្បីចាត់ការតាមនីតិវិធីច្បាប់។ ចំណែកឯបក្ខពួកដែលមានពាក់ព័ន្ធក្នុងអំពើហិង្សាខាងលើ ហើយកំពុងរត់គេចខ្លួន សមត្ថកិច្ចជំនាញ អាវុធហត្ថរាជធានីភ្នំពេញ កំពុងស្រាវជ្រាវឃាត់ខ្លួនបន្ត៕

អត្ថបទ ៖ ម៉េង