ផ្ទុះមីនតោនមួយគ្រាប់បណ្ដាលឲ្យអ្នកបើកត្រាក់​ទ័រ​ភ្ជួរដីម្នាក់របួសធ្ងន់

បុរសវ័យ២៤ឆ្នាំម្នាក់ បានរងរបួសធ្ងន់ត្រូវបានបញ្ជូនទៅសង្គ្រោះបន្ទាន់ភ្លាមៗ នៅមន្ទីរពេទ្យបង្អែកស្រុកអន្លង់វែង បន្ទាប់ពីបើកត្រាក់ទ័រភ្ជួរដីចម្ការ និងបានកិនមីនតោនមួយគ្រាប់ផ្ទុះបង្កការភ្ញាក់ផ្អើលដល់អ្នកស្រុក។

ករណីផ្ទុះមីនតោនបណ្ដាលឲ្យមានអ្នករងរបួសនេះ បានកើតឡើងនៅព្រឹកថ្ងៃទី២៣​ ខែមេសា​ ឆ្នាំ២០២៥នេះ នៅក្នុងភូមិផ្តៀកជ្រុំ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។ ជនរងគ្រោះមានឈ្មោះ ហែម កៅ ភេទប្រុស អាយុ២៤ឆ្នាំ រងរបួសជាទម្ងន់ និងបានបញ្ជូនទៅមន្ទីរពេទ្យបង្អែកស្រុកអន្លង់វែង ខេត្តឧត្តរមានជ័យ។

បន្ទាប់ពីកើតករណីនេះ អាជ្ញាធរមីន ក៏បានអំពាវនាវដល់ប្រជាពលរដ្ឋទាំងអស់​ សូមកុំចូលទៅតំបន់ណាដែលមិនដឹងប្រវត្តិច្បាស់​លាស់​ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកម្ទេចចោល។

ជាមួយគ្នានេះ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) ក៏បានលើកឡើងដែរថា ថ្វីត្បិតសង្គ្រាមត្រូវបានបញ្ចប់​ ប៉ុន្តែសំណល់យុទ្ធភណ្ឌសង្គ្រាមនៅក្នុងព្រះរាជាណាចក្រ​កម្ពុជា នៅតែបន្តបំផ្លិចបំផ្លាញសេចក្តីសុខសុវត្ថិភាពរបស់ប្រជាពលរដ្ឋខែ្មរ​ ហើយរាជរដ្ឋាភិបាលកំពុងតែបន្តខិតខំលុបបំបាត់សត្រូវជាឃាតករលាក់មុខទាំងនេះ៕

អត្ថបទ៖ សុខុម