សន្តិសុខសង្គម

ករណីវ៉ៃប្រពន្ធចុងផ្អើលបណ្ដាញសង្គមដើមខែនេះចៅក្រមសម្រេចមិនឃុំខ្លួនប្រពន្ធដើមទេ

បានផុស

១ year មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

ចៅក្រមស៊ើបសួរសាលាដំបូងរាជធានីភ្នំពេញបានសម្រេចមិនឃុំខ្លួនបណ្ដោះអាសន្នក្រុមខាងប្រពន្ធដើមទេដោយសារបានទទួលស្គាល់កំហុស និងស្ម័គ្រចិត្តទទួលខុសត្រូវចំពោះការខូចខាត ព្រមទាំងមានជំងឺប្រចាំកាយផង។ នេះបើតាមសេចក្ដីប្រកាសព័ត៌មានរបស់សាលាដំបូងថ្ងៃទី៧ ខែឧសភា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីយប់ថ្ងៃទី១ ខែឧសភា ឆ្នាំ២០២៥ ជនត្រូវចោទ ជា រីដា (ប្រពន្ធដើម) និង អ៊ឹង លីមុំ ព្រមទាំងលោក លាប ចត្រា បានបើកឡានទៅបុករថយន្ត និងប្រើប្រាស់ហិង្សាលើអ្នកស្រី ចាប ចិន្តា (ប្រពន្ធចុង) បណ្ដាលឱ្យអ្នកស្រី ចាប ចិន្តា រងរបួសផងដែរ។ ក្រោយកើតហេតុសមត្ថកិច្ចបានឃាត់ខ្លួនភាគីខាងប្រពន្ធដើមបាន២នាក់ ដោយឡែកលោក លាប ចត្រា បានរត់គេចខ្លួន។

ក្នុងសេចក្ដីប្រកាសព័ត៌មានចុះថ្ងៃទី៧ ខែឧសភា ឆ្នាំ២០២៥ សាលាដំបូងរាជធានីភ្នំពេញ បានបញ្ជាក់ថាហេតុការណ៍នេះកើតឡើងដោយអ្នកស្រី ជា រីដា មានកំហឹងជាមួយឈ្មោះ ចាប ចិន្តា ដែលមានទំនាក់ទំនងជាមួយប្ដីរបស់ខ្លួន។ បន្ទាប់ពីសួរចម្លើយជនត្រូវចោទ ពិនិត្យភស្ភុតាង និងដេញដោលរួចមកចៅក្រមស៊ើបសួរបានសម្រេច មិនឃុំខ្លួនបណ្ដោះអាសន្នលើឈ្មោះ ជា រីដា និងអ៊ឹង លីមុំ ដោយ ដោយពួកគេបានទទួលស្គាល់កំហុង ស្ម័គ្រចិត្តទទួលខុសត្រូវ និងកំពុងមានជំងឺប្រចាំកាយផង។

ក្នុងសេចក្ដីប្រកាសព័ត៌មាននោះសរសេរថា៖ «ដូចនេះចៅក្រមស៊ើបសួរ សម្រេចដាក់ជនត្រូវចោទឱ្យស្ថិតនៅក្រោមការត្រួតពិនិត្យតាមផ្លូវតុលាការ ជំនួសការឃុំខ្លួនបណ្ដោះអាសន្ន តាមមាត្រា ២២៦ក្រមនីតិវិធីព្រហ្មទណ្ឌ នៃព្រះរាជាណាចក្រកម្ពុជា»។

ដោយឡែកជនត្រូវចោទឈ្មោះ លាប ចត្រា ដែលកំពុងរត់គេចខ្លួនចៅក្រមស៊ើបសួរ និងបន្តនីតិវិធីតាមផ្លូវច្បាប់៕

អត្ថបទដោយ ហ៊ុន សិរីវឌ្ឍន៍

Related Topics:ករណីហិង្សា