មេបញ្ជាការកងរាជអាវុធហត្ថខេត្តកំពង់ស្ពឺ ឱ្យកម្លាំងក្រោមឱវាទត្រៀមខ្លួន២៤ម៉ោង រងចាំបទបញ្ជាប​ម្រើពលរដ្ឋ

ឧត្តមសេនីយ៍ត្រី ម៉េង ស៊្រុន មេបញ្ជាការកងរាជអាវុធហត្ថខេត្តកំពង់ស្ពឺ  ឱ្យកងកម្លាំងត្រៀមអន្តរាគមន៍២៤ម៉ោង លើ២៤ម៉ោង ដើម្បីការពារសុវត្ថិភាព ជូនប្រជាពលរដ្ឋក្នុងមូលដ្ឋាន ស្ថិតនៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ។ លោកមេបញ្ជាការ ប្រាប់ទៅកាន់កម្លាំងក្រោមឱវាទដូច្នេះ កាលពីថ្ងៃទី១៦ ខែមិថុនា។

លោកមេបញ្ជាការ ប្រាប់ទៅកាន់កងកម្លាំងដូច្នេះ៖« ចាប់ពីថ្ងៃនេះទៅកម្លាំងកងរាជអាវុធហត្ថខេត្តកំពង់ស្ពឺទាំងអស់ត្រូវត្រៀមចំនុចខ្ពស់២៤ម៉ោងលើ២៤ម៉ោង រហូតទទួលបានបទបញ្ជាថ្មី ហាមអវត្តមានដាច់ខាត​ »។

លោកមេបញ្ជាការបានបញ្ជាក់ថាហាមដាច់ខាត សម្រាប់នាយទាហាន នាយទាហានរង កងរាជអាវុធហត្ថខេត្តកំពង់ស្ពឺ មិនត្រូវពាក់ព័ន្ធនឹងគ្រឿងញៀនដាច់ខាត ក្នុងករណីរកឃើញនាយទាហាន នាយទាហានរងរូបណា ជាប់ពាក់ពន្ធ័នឹងករណីគ្រឿងញៀន គឺត្រូវអនុវត្តតាមច្បាប់ ដោយមិនមានការលើកលែងដាច់ខាត ។

ឧត្ដមសេនីយ៍ត្រី ម៉េង ស៊្រុន ក៏បញ្ជាឱ្យកងកម្លាំងត្រូវគោរពវិន័យ ក្នុងអង្គភាព និងបទបញ្ជារបស់ថ្នាក់ដឹកនាំ គឺទទួលបញ្ជា អនុវត្ត រាយការណ៍អំពីលទ្ធផលសម្រេចបាន ចំណែកកម្លាំងបញ្ជាមណ្ឌលប្រតិបត្តិការ និងវេនប្រចាំការ នាយទាហានទាំងអស់់ត្រូវ គោរពនូវតួនាទីភារកិច្ចរបស់ខ្លួន។

មេបញ្ជាការ ម៉េង ស៊្រុន ក៏ប្រាប់ឱ្យនាយទាហាន នាយទាហានរង ត្រូវតែចូលរួមគោរពទងជាតិឲ្យបានគ្រប់គ្នា និងផ្សព្វផ្សាយបន្តនូវលទ្ធផលការងារប្រចាំសប្តាហ៍និងទិសដៅបន្ត៕