វឿន វាសនា ក្រសោប​បាន​តំណែងកីឡាករល្អប្រចាំការប្រកួត ៧ លើកពី​ជ័យជម្នះ ១៣ លើក​

កីឡាករបាល់ទះជម្រើសជាតិកម្ពុជា វឿន វាសនា បានជួយក្រុមបាល់ទះ Win Streak ឈ្នះ ១៣ ប្រកួតជាប់គ្នាក្នុងលីគបាល់ទះអាជីព​តៃវ៉ាន់ បន្ទាប់​ពី​បញ្ចប់ការ​ប្រកួត ២ ​លើក​កាល​ចុងសប្តាហ៍មុននេះ ហើយក្នុងចំណោមការប្រកួតទាំង ២ នោះ វាសនា ក៏ត្រូវបានជ្រើសរើសជាកីឡាករល្អបំផុតប្រចាំការប្រកួត ១ លើក។

កាលពីថ្ងៃ សៅរិ៍ ទី ១៥ ខែ វិច្ឆិកា ឆ្នាំ ២០២៥ ក្រុមបាល់ទះ Win Streak បានយកឈ្នះលើក្រុម TSG Skyhawks ក្នុងលទ្ធផល ៣ សិតទល់ ១។ ចំណែក​​នៅ​ថ្ងៃ អាទិត្យ ទី ១៦ ខែ វិច្ឆិកា ពួកគេបានបន្តយកឈ្នះលើក្រុម Taipei East Power ក្នុងលទ្ធផល ៣ សិតទល់ ១។

ជ័យជម្នះ ១៣ ប្រកួតជាប់ៗគ្នានៅរដូវកាលនេះ ជាពិសេសការប្រកួត ២ ប្រកួតចុងក្រោយ គឺសុទ្ធតែមានការចូលរួមសាងគុណសម្បត្តិយ៉ាងធំធេងដោយកីឡាករកម្ពុជា មានដើមកំណើតមកពីខេត្តបាត់ដំបង។ រឿងដ៏អស្ចារ្យបំផុត គឺការប្រកួតទល់នឹងក្រុម TSG Skyhawks កីឡាករត្រូវបានជ្រើសរើសជាកីឡាករល្អបំផុតប្រចាំការប្រកួត​ បន្ទាប់ពីរកបានពិន្ទុសរុបចំនួន ២៨ ពិន្ទុ។

នេះជាលើកទី ៧ ហើយសម្រាប់ វឿន វាសនា ដែលជាប់ជាកីឡាករល្អបំផុតប្រចាំការប្រកួតនៅរដូវកាលនេះជាមួយក្រុមបាល់ទះ Win Streak បន្ទាប់ពីឆ្លងកាត់ការប្រកួតចំនួន ១៣ ប្រកួត។ តាមរយៈស្ថិតិទាំងនេះ បានធ្វើឱ្យកីឡាករ កម្ពុជា វ័យ ២៤ ឆ្នាំ កម្ពស់ ១.៩៦ ម៉ែត្រ កំពុងក្លាយជាកីឡាករដ៏លេចធ្លោបំផុតរបស់ Win Streak និងនៅលីគបាល់ទះ តៃវ៉ាន់ ទាំងមូល៕

អត្ថបទ៖ សេម កុសល