កីឡា

ក្រុមប៉េតង់ភូមិថ្មី កំពុងលេចធ្លោខ្លាំង និងទើបឈ្នះពានរង្វាន់លេខ១ ប្រចាំខេត្តកែប

បានផុស

៨ ខែ មុន

នៅ

ថ្ងៃអង្គារ ២៥ វិច្ឆិកា ២០២៥

ដោយ

ក្លឹបប៉េតង់ភូមិថ្មីខេត្តកែប កំពុងមានកេរ្តិ៍ឈ្មោះល្បី និងលេចធ្លោខ្លាំង ខណៈពេលថ្មីៗនេះទើបឈ្នះពានរង្វាន់លេខ១ ប្រចាំខេត្តកែប ឆ្នាំ២០២៥ លើវិញ្ញាសា ៣ ទល់ ៣ បន្ទាប់ពីយកឈ្នះលើក្រុមខ្លាំង រាជ្យបុត្រសេះស ក្នុងវគ្គផ្ដាច់ព្រ័ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមប៉េតង់ភូមិថ្មីខេត្តកែប

លោក ម៉ាត់ អ៊ីមរ៉ន ប្រធានក្រុមប៉េតង់ភូមិថ្មី បានឲ្យដឹងថា សម្រាប់រូបលោក និងក្រុមទាំងមូលសប្បាយរីករាយជាខ្លាំងដែលដណ្ដើមបានពានរង្វាន់លេខ១ ក្នុងការប្រកួតកីឡាមហាជនជ្រើសរើសជើងឯកថ្នាក់ខេត្ត ប្រចាំឆ្នាំ២០២៥ ថ្មីៗនេះជូនមូលដ្ឋានរបស់ខ្លួន។ កន្លងទៅក្រុមប៉េតង់ភូមិថ្មីមិនសូវទទួលបានជោគជ័យនោះឡើយដោយធ្លាក់ចេញពីការប្រកួតបន្តបន្ទាប់។

ទិដ្ឋភាពការប្រកួតកន្លងទៅ

ប្រធានក្រុមដែលសកម្មលើបន្តទៀតថា ដោយសារតែការខំប្រឹងប្រែងពីកីឡាករក្នុងក្រុមមានដូចជាបង្ហាត់គ្នាទៅវិញទៅមក ស្វែងយល់ពីចំណុចខ្លាំង ចំណុចខ្សោយ និងបច្ចេកទេសលេងផ្សេងៗ រួមទាំងការបង្កើតព្រឹត្តិការណ៍ប្រកួតមិត្តភាពជាច្រើនក្នុងមួយខែៗទើបធ្វើឲ្យក្រុមមានសមត្ថភាពភាពរីកចម្រើនជាលំដាប់។

លោក ម៉ាត់ អ៊ីមរ៉ន ដោយសារតែលោកមានចិត្តស្រឡាញ់កីឡានេះខ្លាំងទើបជំរុញឲ្យលោកបង្កើតឲ្យមានទីលានហ្វឹកហាត់ត្រឹមត្រូវ និងតែងតែព្យាយាមបង្ហោះផ្សព្វផ្សាយពីសកម្មភាពរបស់ក្រុមលើការហ្វឹកហាត់ផងនោះទើបក្លឹបប៉េតង់ភូមិថ្មីមានការគាំទ្រច្រើនទាំងអ្នកនៅក្នុងភូមិ និងអ្នកមកពីក្រៅជាដើម។ លើសពីនេះទៅទៀតក្លឹបរបស់លោកតែងតែមានជាការប្រកួតពានរង្វាន់ប្រចាំភូមិ និងការប្រកួតមិត្តភាពផ្សេងៗរហូតមានការគាំទ្រចូលរួមជាពីបណ្ដាក្រុមជិតឆ្ងាយ។

ទិដ្ឋភាពការប្រកួតកន្លងទៅ

បន្ទាប់ពីយកឈ្នះលើក្រុមខ្លាំង រាជ្យបុត្រសេះស នៅវគ្គផ្ដាច់ព្រ័ត្រក្រុមភូមិថ្មីបានទទួលការកោតសរសើរពីថ្នាក់ដឹកនាំខេត្តកែប និងជំរុញលើកទឹកចិត្តដល់កីឡាករឲ្យបន្តខំប្រឹងប្រែងហ្វឹកហាត់បន្ថែមទៀតដើម្បីមានសមត្ថភាពរឹតតែល្អត្រៀមក្នុងការប្រកួតធំៗនៅពេលខាងមុខទៀត។

ទិដ្ឋភាពការប្រកួតកន្លងទៅ

បញ្ជាក់ដែរថា ក្រោយឆ្លងកាត់ការ ៦ប្រកួតគឺក្រុមប៉េតង់ភូមិថ្មី ឈ្នះ ៥ប្រកួត និងចាញ់ ១ប្រកួត។ ប្រកួតចុងក្រោយវគ្គផ្ដាច់ព្រ័ត្រយកឈ្នះលើក្រុមខ្លាំង រាជ្យបុត្រសេះស ដោយលទ្ធផល ១៣-៦ ទទួលបានចំណាត់ថ្នាក់លេខ១ ប្រចាំខេត្តកែប។ កាលពីឆ្នាំមុនក្រុមប៉េតង់ភូមិថ្មីនេះក៏ទទួលបានពានរង្វាន់លេខ១ ផងដែរលើវិញ្ញាសា ២ ទល់ ២។ ក្រុមប៉េតង់ភូមិថ្មីនេះគឺបង្កើតឡើងរយៈពេលប្រហែលជាង ១ឆ្នាំមកហើយ។ ក្លឹបមួយនេះគឺស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប។ សមាជិកក្រុមលើវិញ្ញាសា ៣ ទល់ ៣ នេះមានកីឡាករ ម៉ាត់ អ៊ីមរ៉ន ប្រធានក្រុម កីឡាករ យូប រំលី កីឡាករ ម៉ាន ហ្វករ៉ហ្ស៊ី និងកីឡាករ ម៉ាត់ សាអ៊ីត។ ការប្រកួតផ្នែកប៉េតង់នេះធ្វើឡើងមុនគេកាលពីថ្ងៃទី១៥ ដល់ ១៦ ខែវិច្ឆិកា ឆ្នាំ២០២៥៕