កីឡា

លោក Jasper Paas យល់ថា ការបញ្ជូនក្រុមកីឡាទៅស៊ីហ្គេម នៅថៃជាសញ្ញាល្អ

បានផុស

៥ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

លោក Jasper Paas អនុប្រធាន និងជាគ្រូបង្វឹកនៅសហព័ន្ធកីឡាជឺជីតស៊ូកម្ពុជា បានបង្ហាញទស្សនៈផ្ទាល់ខ្លួនចំពោះការសម្រេចរបស់កម្ពុជាក្នុងការបញ្ជូនអត្តពលិកទៅចូលរួមប្រកួតកីឡាស៊ីហ្គេម លើកទី៣៣ នៅប្រទេសថៃ ជាសញ្ញាល្អសម្រាប់ចំណងការទូតនៅក្នុងតំបន់។

នៅក្នុងបទសម្ភាសជាមួយសារព័ត៌មាន«កម្ពុជាថ្មី» លោក Jasper Paas ដែលត្រូវដឹកនាំប្រតិភូ និងអត្តពលិកកីឡាជឺជីតស៊ូជម្រើសជាតិកម្ពុជាទៅប្រកួតស៊ីហ្គេម នៅប្រទេសថៃ បានលើកឡើងថា ៖«និយាយពីអារម្មណ៍ផ្ទាល់ខ្លួន ខ្ញុំគាំទ្រសម្រាប់ការបញ្ជូនកីឡាករ កីឡាការិនីទៅចូលរួមប្រកួតស៊ីហ្គេម ឆ្នាំនេះ។ ដូចខ្ញុំធ្លាប់និយាយអីចឹង កីឡាមិនពាក់ព័ន្ធនឹងនយោបាយទេ ហើយវាជាសញ្ញាល្អទៅវិញចំពោះសហគម និងប្រទេសក្នុងតំបន់ដែលយើងបង្ហាញពីចំណងការទូតកាន់តែប្រសើរតាមរយៈកីឡា»។

លោកបានឲ្យដឹងថា សហព័ន្ធកីឡាជឺជីតស៊ូកម្ពុជាបានសម្រេចបញ្ជូនប្រតិភូ និងអត្តលិកចំនួន ១៤ នាក់ ក្នុងនោះមានកីឡាករ កីឡាការិនី ១១ នាក់ ទៅចូលរួមការប្រកួត និងរំពឹងទទួលបានលទ្ធផលល្អ បន្ទាប់ពីខិតខំហ្វឹកហាត់អស់រយៈពេលពេញមួយឆ្នាំ។

លោក Jasper Paas បានលើកឡើងថា ៖«ទោះមានបញ្ហាព្រំដែន ពួកយើងនៅតែហ្វឹកហាត់តាមផែនការ និងត្រៀមខ្លួនសម្រាប់ស៊ីហ្គេមឆ្នាំនេះ។ ខ្ញុំមិនទាន់ច្បាស់ថា យើងប្រកួតប៉ុន្មានវិញ្ញាសាទេ ពីព្រោះកីឡាករ កីឡាការិនីយើងប្រកួតវិញ្ញាសាផ្សេងៗគ្នាដែលម្នាក់ៗអាចពីរវិញ្ញាសា»។

«យើងនឹងប្រឹងស្វែងរកមេដាយឲ្យបានច្រើនដូចជាយើងទទួលបានកាលស៊ីហ្គេម ឆ្នាំ ២០២៣ នៅពេលកម្ពុជាធ្វើជាម្ចាស់ផ្ទះ។ ខ្ញុំជឿជាក់ថា យើងនឹងទទួលបានមេដាយ តែខ្ញុំមិនដឹងថា មេដាយអ្វីទេ តែយ៉ាងហោចណាស់ ក៏មេដាយមាស ១ ដែរ»។

កីឡាជឺជិតស៊ូ ស្ថិតក្នុងចំណោមកីឡាចំនួន ១៣ ប្រភេទចុងក្រោយ ស្មើនឹងប្រតិភូ និងអត្តពលិកចំនួន ១៥០នាក់ ដែលក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា បានសម្រេចបញ្ជូនទៅ បន្ទាប់ពីសម្រេចដកកីឡា ៨ ប្រភេទចេញដោយសារបារម្ភពីសុវត្ថិភាព៕