កីឡា

អត្តពលិកកម្ពុជាទាំងអស់ស្នាក់រួមគ្នាមិនបែងចែកតាមប្រភេទកីឡាដូចរាល់ដងនោះឡើយនៅស៊ីហ្គេម ថៃ

បានផុស

៥ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

ក្រុមអត្តពលិកកម្ពុជាទាំង ១២ប្រភេទកីឡានឹងត្រូវប្រកួតពីរកន្លែងផ្សេងគ្នាគឺនៅឯទីក្រុងបាងកក និងខេត្តឈុនបូរី ស្របពេលការស្នាក់នៅគឺរួមគ្នាដោយមិនគិតប្រភេទកីឡាណានោះទេក្រោមការយកចិត្តទុកដាក់ខ្ពស់លើការការពារសន្តិសុខយ៉ាងតឹងរឹងពីម្ចាស់ផ្ទះថៃ អំឡុងស៊ីហ្គេម ចាប់ពីថ្ងៃទី៩ ដល់ ២០ ខែធ្ន ២០២៥។

រូបភាពតំណាង

នេះបើតាមការបញ្ជាក់ពីលោក ញ៉ាន សុខវិសាល នាយបេសកកម្មកម្ពុជា បានលើកឡើងថា ពាក់ព័ន្ធនិងការហូបចុកស្នាក់នៅ ប្រតិភូ ក្រុមអត្តពលិកកម្ពុជាមានលក្ខណៈពិសេសជាងបណ្ដាប្រទេសផ្សេងៗដោយបានស្នាក់នៅរួមគ្នាតែម្ដងដោយមិនបែងចែកតាមប្រភេទកីឡានោះទេ។ ចំណុចនេះវាខុសពីបណ្ដាប្រទេសចូលរួមផ្សេងៗដែលត្រូវស្នាក់នៅទៅតាមប្រភេទកីឡានិមួយៗ។

ថ្នាក់ដឹកនាំឆ្នើមខាងផ្នែកកីឡាខាងលើបន្តទៀតថា ជុំវិញសន្តិសុខ និងសុវត្ថិភាពវិញគឺនឹងមានការយកចិត្តទុកដាក់ខ្ពស់ និងតឹងរឹងបំផុតលើប្រតិភូ គ្រូបង្វឹក អត្តពលិកទាំងអស់មិនថានៅឯទីលានប្រកួត និងពេលធ្វើដំណើរនោះទេ។ ពោលនឹងមានការមើលថែសុវត្តិភាពខ្ពស់ចំពោះក្រុមកម្ពុជា។

លោក ញ៉ាន សុខវិសាល

បញ្ជាក់ដែរថា ស៊ីហ្គេម លើកទី៣៣ ឯប្រទេសថៃ ឆ្នាំ២០២៥ នេះកម្ពុជា សម្រេចបញ្ជូនតែ ១២ប្រភេទកីឡា ស្មើហ្នឹងអត្តពលិក ១៣៧នាក់ប៉ុណ្ណោះ ព្រោះបារម្ភពីសុខសុវត្ថិភាពផ្សេងៗដោយសារតែជម្លោះព្រំដែននៅមិនទាន់ស្ងប់ស្ងាត់ ១០០% នៅឡើយទេ។ ១២ប្រភេទកីឡារួមមាន កីឡាហែលទឹក កីឡាអត្តពលកម្ម កីឡាអេឡិចត្រូនិក កីឡាគុនដាវ កីឡាកាយសម្ព័ន្ធ កីឡាជឺជីតស៊ូ កីឡាឃីតបុកស៊ីង កីឡាតេក្វាន់ដូ-WT កីឡាជិះសេះ កីឡាម៉ូតូទឹក (Jetski) កីឡាទ្រីយ៉ាត្លុង និងកីឡាបាល់ទាត់លើតុ៕ (ប្រភពដើម NOCC)

អត្ថបទដោយ៖ នួន ស៊ីណា