កីឡា

ម្ចាស់ផ្ទះ ថៃ រងភាពអាម៉ាស់ជាថ្មី ក្រោយកីឡាការិនី Esports របស់ខ្លួនម្នាក់ ប្រើឧបករណ៍ជំនួយខុសច្បាប់

បានផុស

៧ ខែ មុន

នៅ

ថ្ងៃអង្គារ ១៦ ធ្នូ ២០២៥

ដោយ

កីឡាការិនីអេឡិចត្រូនិក របស់ក្រុមជម្រើសជាតិថៃម្នាក់ ត្រូវបានបណ្តេញចេញពីការប្រកួតភ្លាមៗតែ ក្នុងព្រឹត្តិការណ៍កីឡាស៊ីហ្គេម លើកទី ៣៣ បន្ទាប់ពីត្រូវបានរកឃើញកំហុស ពីការរំលោភបំពានច្បាប់ប្រកួតដែលមិនអាចលើកលែងបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពី Bangkok Post បានឱ្យដឹងថា ហេតុការណ៍នេះបានកើតឡើងក្នុងការប្រកួតវិញ្ញាសា Arena of Valor ផ្នែកនារីទល់នឹងក្រុមកីឡាការិនីវៀតណាម។ កីឡាការិនីឈ្មោះ Naphat Warasin ត្រូវបានរកឃើញថា បានប្រើប្រាស់ ឧបករណ៍ជំនួយហាមឃាត់ (កម្មវិធីភាគីទីបី) ដែលមិនត្រូវបានអនុញ្ញាតឡើយ ហើយទង្វើនេះបានក្លាយជារឿងផ្ទុយនឹងបទប្បញ្ញត្តិបច្ចេកទេសនៃការប្រកួតកីឡាអេឡិចត្រូនិក នៅក្នុងកីឡាស៊ីហ្គេម លើកទី៣៣។

បន្ទាប់ពីមានការស៊ើបអង្កេត និងពិនិត្យភស្តុតាងរួចរាល់ គណៈកម្មការរៀបចំការប្រកួតកីឡាអេឡិចត្រូនិក បានសម្រេចថា ករណីនេះមានភាពធ្ងន់ធ្ងរ ដល់ថ្នាក់ត្រូវបណ្តេញចេញពីការប្រកួតតែម្តង។ ការសម្រេចនេះត្រូវបានសម្រេចជាផ្លូវការ ដោយសាមីកីឡាការិនីមិនអាចប្ដឹងឧទ្ធរណ៍ដើម្បីតវ៉ាបានឡើយ។

ក្រៅពីគណៈកម្មការរៀបចំការប្រកួតបានសម្រេចជាផ្លូវការពីការបណ្តេញពីការប្រកួត គណៈកម្មាធិការជាតិអូឡាំពិកថៃ ក៏ចេញមុខទទួលស្គាល់ពីកីឡាការិនីរបស់ខ្លួនបានប្រព្រឹត្តខុសពីច្បាប់់ពិតមែន ហើយក៏សម្រេចបណ្តេញចេញពីការប្រកួតដែរ។

សហព័ន្ធកីឡាអេឡិចត្រូនិកថៃ បានទទួលស្គាល់ពីកំហុសកីឡាការិនីរបស់ខ្លួន និងគោរពតាមការសម្រេចនេះ។ ពួកគេ បានបញ្ជាក់ថា នឹងធ្វើការពិនិត្យផ្ទៃក្នុងបន្ថែម ដើម្បីរក្សាភាពយុត្តិធម៌ និងសុចរិតភាពក្នុងការប្រកួត ហើយទប់ស្កាត់មិនឲ្យមានករណីរំលោភច្បាប់បែបនេះកើតឡើយនាពេលអនាគត៕