កីឡា

ការប្រកួតកីឡាបាល់ទះថ្នាក់ជាតិ ពានរង្វាន់សម្តេច ស ខេង លើកទី៤ លើកទៅខែកុម្ភៈ

បានផុស

៤ ខែ មុន

នៅ

ថ្ងៃអង្គារ ៦ មករា ២០២៦

ដោយ

ការប្រកួតកីឡាបាល់ទះជើងឯកជាតិ ពានរង្វាន់សម្តេចក្រឡាហោម ស ខេង រដូវកាលទី៤ ត្រូវបានលើកពេលទៅប្រកួតចាប់ពីថ្ងៃទី៧ ខែកុម្ភៈ ដល់ ថ្ងៃទី១ ខែមីនា ឆ្នាំ ២០២៦។

តាមសេចក្តីប្រកាសព័ត៌មានចាស់ ការប្រកួតកីឡាបាល់ទះពានរង្វាន់សម្តេចក្រឡាហោម ស ខេង លើកទី៤ គ្រោងធ្វើនៅខែមករា ឆ្នាំ ២០២៦។ នៅថ្ងៃទី៦ ខែមករា ឆ្នាំ ២០២៦ សហព័ន្ធកីឡាបាល់ទះកម្ពុជា បានប្រកាសពីការផ្លាស់ប្តូរកាលបរិច្ឆេទនៃការប្រកួតថ្មី។ ៣រដូវកាលកន្លងមក ការប្រកួតពានរង្វាន់ថ្នាក់ជាតិមួយនេះធ្វើនៅខែធ្នូ នៃចុងឆ្នាំនីមួយៗ ប៉ុន្តែរដូវកាលទី៤ ឆ្នាំ ២០២៦ ត្រូវបានលើកទៅខែកុម្ភៈ ដល់ ខែមីនា។

កាលពីខែធ្នូ ឆ្នាំ ២០២៤ លក្ខន្តិកៈនៃការប្រកួតអនុញ្ញាតឲ្យកីឡាករជម្រើសជាតិ ឬកីឡាករដែលមានសមត្ថភាពកម្រិត A តែ ២ នាក់ និងកីឡាករបរទេស ១ នាក់បង្ហាញខ្លួននៅលើទីលាន ខណៈកីឡាករ ៣ នាក់ទៀតគឺជាកីឡាករកម្រិត B ឬ យុវជន។ ការធ្វើបែបនេះដើម្បីពង្រឹងសមត្ថភាពកីឡាករវ័យក្មេងឲ្យមានបទពិសោធ សមត្ថភាព និងស្មារតីលើសម្រាប់បន្តវេនក្រុមជម្រើសជាតិលើឆាកអន្តរជាតិ។ ទោះជាយ៉ាងណា រដូវកាលទី៤ ឆ្នាំ ២០២៦ មិនទាន់ត្រូវបានប្រកាសលក្ខន្តិកៈនៃការប្រកួតលំអិតឡើយ។

ការប្រកួត ពានរង្វាន់សម្តេចក្រឡាហោម ស ខេង ពីមួយរដូវកាលទៅមួយរដូវកាល ត្រូវបានកែប្រែលក្ខន្តិកៈជាបន្តបន្ទាប់ដើម្បីអភិវឌ្ឍធនធានកីឡាករវ័យក្មេងកម្ពុជា ពីព្រោះកីឡាករអាជីពកម្រិត A គឺប្រកួតពានរង្វាន់តេជោលីគ។

ការប្រកួតកីឡាបាល់ទះពានរង្វាន់សម្តេចក្រឡាហោម ស ខេង បានធ្វើ ៣ លើកមកហើយគឺលើកទី១ ក្រុម វិសាខា B ជាជើងឯក លើកទី២ ក្រុមក្រសួងមហាផ្ទៃ B ជាជើងឯក និងលើកទី៣ ក្រុមខេត្តស្វាយរៀង ជាជើងឯក។