គូ​ប្រជែង​របស់​ក្លិប​កម្ពជា គឺ Dewa និង Manila កំពុង​បង្កើន​​កីឡាករ​​បរទេស​ថ្មី ក្នុង​ពាន​អាស៊ី

ការប្រកួតពានរង្វាន់ក្លិបទ្វីបអាស៊ីកម្រិតទី ៣ AFC Challenge League នៅរដូវកាល ២០២៥-២០២៦ នឹងកាន់​តែតានតឹងខ្លាំង​ បន្ទាប់ពីក្រុមទាំងអស់ ជាពិសេសក្រុមនៅតំបន់ អាស៊ីខាងកើត សុទ្ធតែបន្ថែមសមាជិកកីឡាករបរទេសថ្មីល្អ ដើម្បីប្រជែងក្នុងពាននេះ។

ការប្រកួតពាន ACGL បានឈានដល់វគ្គ ៨ ក្រុមចុងក្រោយហើយ ខណៈនៅ តំបន់អាស៊ីខាងកើត គឺក្រុម ព្រះខ័នរាជស្វាយរៀង ត្រូវជួបក្រុម ភ្នំពេញក្រោន និង Dewa United របស់ ឥណ្ឌូណេស៊ី ត្រូវជួបជាមួយក្រុម Manila Diger FC របស់ ហ្វីលីពីន។

យ៉ាងណា មុនការប្រកួតវគ្គ ៨ ក្រុមមកដល់ ឃើញ ថា ទាំងក្រុម កម្ពុជា និងក្រុមផ្សេងៗសុទ្ធតែបន្ថែមកីឡាករបរទេសថ្មី ដើម្បីពង្រឹងក្រុមឱ្យកាន់តែខ្លាំងក្លា។ ក្រុម Dewa United មុនទីផ្សារដោះដូរកីឡាករខែ មករា ពួកគេមានកីឡាករបរទេសសរុបចំនួន ៧ នាក់ ប៉ុន្តែនៅខែ មករា ឆ្នាំ ២០២៦ ពួកគេបាននាំចូលកីឡាករបរទេសចំនួន ៤ នាក់ទៀត ដែលធ្វើឱ្យពួកគេមានកីឡាករបរទេសបច្ចុប្បន្នរហូតដល់ទៅ ១១ នាក់។

កីឡាករបទេសថ្មី ដែល Dewa ទើបតែនាំចូលថ្មីកាលពីខែ មករា កន្លងទៅ រួមមានខ្សែការពារសញ្ជាតិ ចាម៉ៃកា Damion Lowe, ខ្សែប្រយុទ្ធស្លាបឆ្វេងសញ្ជាតិ ម៉ារ៉ុក-អាមេរិក Noah Sadaoui, ខ្សែប្រយុទ្ធស្លាបស្តាំសញ្ជាតិ ប្រេស៊ីល Vico និងខ្សែប្រយុទ្ធកណ្តាលសញ្ជាតិ ជប៉ុន Kodai Tanak។

ក្រឡេកទៅមើលក្រុម Manila Digger FC វិញ មានកីឡាករបរទេសស្រាប់ កាលពីមុនទីផ្សារដោះដូរកីឡាករខែ មករា រហូតដល់ទៅ ១៤ នាក់ទៅហើយ។ យ៉ាងណា នៅខែ មករា កន្លងទៅនេះ ពួកគេបាននាំចូលកីឡាករបរទេសថ្មី ២ រូបបន្ថែមទៀត ដើម្បីត្រៀមការប្រកួតពាន ACGL។ កីឡាករថ្មី ២ រូប ដែលពួកគេទើបនាំចូលរួមមានខ្សែបម្រើការពារសញ្ជាតិ ហ្គាំប៉ី កីឡាករ Assan Badjie និងខ្សែប្រយុទ្ធសញ្ជាតិ ហ្គាំប៉ី មួយរូបទៀត កីឡាករ Mustapha Jallow។

ការបន្ថែមកីឡាករបរទេសថ្មីៗសម្រាប់ ២ ក្រុមខាងលើ នឹងធ្វើឱ្យការប្រកួតកាន់តែតានតឹងសម្រាប់ក្រុម កម្ពុជា នៅវគ្គពាក់កណ្តាលផ្តាច់ព្រ័ត្រ។ នៅវគ្គពាក់កណ្តាលផ្តាច់ព្រ័ត្រ ប្រាកដណាស់ ថា នឹងមានក្រុម កម្ពុជា មួយត្រូវឡើងរវាង ភ្នំពេញក្រោន និង​ ព្រះខ័នរាជស្វាយរៀង។ នៅវគ្គ​ពាក់​កណ្តាល​ផ្តាច់​ព្រ័ត្រ ក្រុម​​របស់​កម្ពុជា នឹង​ជួប Dewa United ឬ Manila Digger។

គួរឱ្យដឹង ថា ការប្រកួតវគ្គ ៨ ក្រុមពាន ACGL ប្រចាំតំបន់ អាស៊ីខាងកើត នឹងធ្វើឡើង ២ ជើង ដោយជើងទី ១ នៅថ្ងៃទី ៥ ខែ មីនា និងជើងទី ២ នៅថ្ងៃទី ១២ ខែ មីនា ឆ្នាំ ២០២៦៕

អត្ថបទ៖ សេម កុសល