កីឡា

ឈ្នះ ៣-០ ឡើងទៅជុំទី៣ មែនតែលោក អ៊ូ សុផល កូនក្រុមលេងអត់កើតសោះមិនដឹងអារម្មណ៍ទៅណាម្នាក់ៗ

បានផុស

៥ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

លោក អ៊ូ សុផល គ្រូបង្វឹករបស់ក្រុមបាល់ទះក្រសួងមហាផ្ទៃ បង្ហាញអារម្មណ៍មិនសូវសប្បាយចិត្តជាមួយកូនក្រុមនោះឡើយ ដោយសារតែលេងមិនសូវបានល្អលេងដោយមិនមានអារម្មណ៍សោះម្នាក់ៗបើទោះជាឈ្នះលើដៃគូ ៣-០ បែបនេះក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមហាផ្ទៃ និងស្នងការសៀមរាប

គ្រូបង្វឹករបស់ក្រសួងមហាផ្ទៃ លោក អ៊ូ សុផល បានឲ្យដឹងថា ការប្រកួតប៉ះស្នងការ ន.ប ខេត្តសៀមរាប ម្សិលមិញនេះចំណុចដែលកូនក្រុមធ្វើបានល្អគឺមានតិចណាស់ ប៉ុន្តែចំណុចខ្វះខាតវិញគឺមានច្រើនមែនទែន។ នេះដោយសារតែប៉ះខាងសៀមរាបកម្រិតនៅក្រោមមហាផ្ទៃទើបអាចទទួលបានជ័យជម្នះក្នុងប្រកួតមួយនេះបាន។ ប្រសិនបើប៉ះក្រុមដែលល្អមានកម្រិតប្រហាក់ប្រហែលគឺមហាផ្ទៃយ៉ាប់ហើយបើលេងដូចម្សិលមិញនេះនោះ។

លោក អ៊ូ សុផល

លោក អ៊ូ សុផល បន្ថែមទៀតថា ចំណុចខ្វះខាតនោះគឺការចាប់សេវាមិនសូវបានល្អ និងធ្វើឲ្យខូចសេវាវិញក៏ច្រើនផងដែរ។ កីឡាករហាក់ដូចជាមិនមានអារម្មណ៍ក្នុងការលេង និងមិនបានប្រមូលអារម្មណ៍ឲ្យមូលផ្តោតតែលើការប្រកួតនោះទេ។ ជាមួយគ្នានោះដែរលោកបានព្យាយាមសម្រួលអារម្មណ៍ឲ្យកីឡាករផ្តោតលើការប្រកួតឡើងវិញដែរ ប៉ុន្តែម្នាក់ៗគឺនៅដដែល។

ក្រុមមហាផ្ទៃ និងស្នងការសៀមរាប

បញ្ជាក់ដែរថា ម្សិលមិញនេះក្រុមបាល់ទះក្រសួងមហាផ្ទៃ បានយកឈ្នះលើក្រុមបាល់ទះស្នងការ ន.ប ខេត្តសៀមរាប ដោយលទ្ធផល ៣-០ បានឡើងទៅជុំទី៣ វគ្គ ៨ក្រុមចុងក្រោយ។ វគ្គ ៨ក្រុមចុងក្រោយនេះ មហាផ្ទៃ នឹងត្រូវប៉ះ វិសាខា នៃវគ្គចាញ់ធ្លាក់ពានរង្វាន់សម្ដេច ក្រឡាហោម លើកទី៤ ឆ្នាំ២០២៦ នេះ៕