ព្រះខ័នរាជស្វាយរៀង មានកីឡាករ ២ នាក់ ធ្លាប់មានឈ្មោះលេងពាន ACGL តាំងពី ២០១៤ ដល់បច្ចុប្បន្ន

ព្រះខ័នរាជស្វាយរៀង មានកីឡាករ ២ នាក់ ធ្លាប់មានឈ្មោះលេងពានរង្វាន់ក្លិបកម្រិតទី ៣ របស់ទ្វីប អាស៊ី AFC Challenge League តាំងពីឆ្នាំ ២០១៤ មកដល់បច្ចុប្បន្ន។

អំឡុងរដូវកាល ២០១៤ ក្លិប ព្រះខ័នរាជស្វាយរៀង ទទួលបានឱកាសចូលលេងពានអន្តរជាតិកម្រិត AFC ជាលើកដំបូង គឺពាន AFC President’s Cup។ នៅក្នុងព្រឹត្តិការណ៍នោះ ព្រះខ័នរាជស្វាយរៀង បានធ្លាក់ត្រឹមវគ្គក្នុងពូល បន្ទាប់ពីស្ថិតនៅពូល C ចាញ់ក្រុម Erchim របស់ ម៉ុងហ្គោលី និង Manang Marshyangdi របស់ នេប៉ាល់។

នៅឆ្នាំ ២០១៤ គឺជាលើកចុងក្រោយ ដែលពាន AFC President’s Cup នេះបានដំណើការប្រកួត។ លុះរំលងមកដល់រដូវកាល ២០២៤-២០២៥ ទើបពាននេះចាប់ផ្តើមដំណើការជាថ្មី ដោយប្រែឈ្មោះថា AFC Challenge League ដែលបន្តមកដល់បច្ចុប្បន្ន។

យ៉ាងណា បើក្រឡេកមើលសមាសភាពកីឡាករ ដែលបន្តលេងតាំងពីពេលនោះមកដល់បច្ចុប្បន្ន គឺមានតែ ២ នាក់ប៉ុណ្ណោះ រួមមានអ្នកចាំទី អាំ សុវណ្ណរ៉ាត់ និងខ្សែប្រយុទ្ធប្រាក់ មុន្នីឧត្តម។ បច្ចុប្បន្ន កីឡាករទាំង ២ ត្រូវបានចាត់ទុកជាកីឡាករ មានឈ្មោះលេងជាមួយ ព្រះខ័នរាជស្វាយរៀង ក្នុងពាន ACGL នេះច្រើនជាងគេបំផុត ពោលរហូតដល់ទៅ ៣ រដូវកាល គឺរដូវកាល ២០១៤, ២០២៤-២០២៥ និង ២០២៥-២០២៦។ ដោយឡែកកីឡាកររបស់ ព្រះខ័នរាជស្វាយរៀង ផ្សេងទៀត ដែលបានលេងកាលពីឆ្នាំ ២០១៤ នោះ ភាគច្រើនបានចាកចេញ និងចូលនិវត្តន៍អស់ហើយ។

គួរឱ្យដឹងផងដែរ ថា នា ២ រដូវកាលចុងក្រោយនេះ អ្នកចាំទីអាំ សុវណ្ណរ៉ាត់ មិនទាន់បានបង្ហាញខ្លួនសូម្បីមួយប្រកួតនៅឡើយទេ ដោយស្ថិតជាអ្នកចាំទីដៃទី ២ បន្ទាប់ពី វីរះ ដារ៉ា។ ចំណែក ប្រាក់ មុន្នីឧត្តម វិញមានឈ្មោះ និងបានលេងកាលពីរដូវកាលមុន ប៉ុន្តែនៅរដូវកាលនេះកីឡាករមិនទាន់បានជាប់ឈ្មោះ និងលេងនៅឡើយទេ ដោយសារតែមានបញ្ហារបួស។

យ៉ាងណា នាការប្រកួតវគ្គ ៨ ក្រុមចុងក្រោយទល់ ភ្នំពេញក្រោន នាខែ មីនា ខាងមុខ ឧត្តម ទំនងនឹងអាចមានឈ្មោះបានចូលលេងឡើងវិញ បន្ទាប់ពី ២ ប្រកួតចុងក្រោយរបស់ ព្រះខ័នរាជស្វាយរៀង ក្នុងពានលីគកំពូល កម្ពុជា និងពានសម្តេចតេជោហ៊ុន សែន កីឡាករមានឈ្មោះជាមួយក្រុមឡើងវិញ៕

អត្ថបទ៖ សេម កុសល