ភ្នំពេញក្រោន មានកីឡាករ៤នាក់ ខណៈព្រះខ័នរាជស្វាយរៀង មាន ២ នាក់បានលេងគ្រប់នាទី​ពាន ACGL រដូវកាលនេះ

ក្រុមបាល់ទាត់ ភ្នំពេញក្រោន មានកីឡាករ ៤ នាក់ និង​ ព្រះខ័នរាជស្វាយរៀង មានកីឡាករ ២ នាក់ កំពុងកាន់កំណត់ត្រាជាកីឡាករលេងមិនដែលបាត់មុខសោះ ពោលសូម្បីមួយនាទីក្នុងពានរង្វាន់ក្លិប អាស៊ី កម្រិតទី ៣ AFC Challenge League នៅរដូវកាល ២០២៥-២០២៦ ។

ការប្រកួតពានរង្វាន់ AFC Challenge League រដូវកាលនេះ បានឈានចូលវគ្គ ៨ ក្រុមចុងក្រោយហើយ ខណៈក្រុម កម្ពុជា ទាំង ២ គឺ ព្រះខ័នរាជស្វាយរៀង និង ភ្នំពេញក្រោន ត្រូវប្រឈមមុខគ្នានៅវគ្គនេះ ២ ជើង ដោយជើងទី ១ នឹងធ្វើឡើងនៅថ្ងៃទី ៥ ខែ មីនា និងជើងទី ២ ធ្វើនៅថ្ងៃទី ១២ ខែ មីនា ឆ្នាំ ២០២៦។

យ៉ាងណា បើក្រឡេកមើលពីការប្រកួតកាលវគ្គជម្រុះក្នុងពូល គឺ ភ្នំពេញក្រោន មានកីឡាករសំខាន់ ៤ នាក់ និងព្រះខ័នរាជស្វាយរៀង មានកីឡាករ ២ នាក់ ដែលលេងបានគ្រប់នាទីទាំងអស់ក្នុងពាន ACGL នេះ។

ភ្នំពេញក្រោន ស្ថិតនៅពូល D ជាមួយ Dewa United, Tainan City និង Shan United។ ក្នុងនោះកីឡាករ បានលេងមិនដែលបាត់មុខសោះ ដោយលេងទាំង ៣ ប្រកួតសរុប ២៧០ នាទីតែម្តង រួមមានខ្សែការពារ Rick Ketting, Raul Feher, Yi-young Park និងខ្សែប្រយុទ្ធ Moses Dyer។

ចំណែក ព្រះខ័នរាជស្វាយរៀង វិញស្ថិតនៅពូល D ជាមួយក្រុម Manila Digger FC, SP Falcons និង Ezra FC។ កីឡាករ ២ នាក់ បានលេងគ្រប់នាទីទាំងអស់សម្រាប់ការប្រកួតទល់នឹងក្រុមទាំង ៣ នោះសរុប ២៧០ នាទី រួមមាន អ្នកចាំទី វីរៈ ដារ៉ា និងខ្សែការពារ Faris Hammouti។

ក្រុមទាំង ២ នឹងត្រូវបន្តបេសកកម្មក្នុងពាន ACGL នេះបន្តទៀតនៅខែ មីនា ខាងមុខ ដោយត្រូវជួបគ្នា ២ ជើងក្នុងវគ្គ ៨ ក្រុមចុងក្រោយ។ ដូច្នេះកំណត់ត្រានេះនឹងមានការប្រែប្រួល ហើយយើងនឹងរង់ចាំមើល ថា តើកីឡាកររូបណា នឹងនៅតែបន្តជាប់ឈ្មោះជាកីឡាករ ដែលលេងពេញគ្រប់ការប្រកួតទាំងអស់?

អត្ថបទ៖ សេម កុសល