កីឡា

ខ្លាំងមិនធម្មតាឆ្នាំនេះក្រុមស្នងការ ន.ប រាជធានីភ្នំពេញឡើងវគ្គផ្ដាច់ព្រ័ត្រទាំងបុរស និងនារី ពានរង្វាន់សម្ដេច ក្រឡាហោម

បានផុស

៤ ខែ មុន

នៅ

ថ្ងៃសៅរ៍ ២៨ កុម្ភៈ ២០២៦

ដោយ

អ្នកគាំទ្រវិស័យកីឡាបាល់ទះនៅកម្ពុជាមានការភ្ញាក់ផ្អើល និងសរសើរជាខ្លាំងចំពោះទម្រង់លេងយ៉ាងល្អរបស់ក្រុមបាល់ទះស្នងការ ន.ប រាជធានីភ្នំពេញ ផ្នែកបុរសដែលឡើងខ្លាំងបានទម្លាក់ក្រុមលំដាប់ៗដោយមិនឲ្យតដៃបាន ស្របពេលផ្នែកនារីក៏បានឡើងទៅវគ្គផ្ដាច់ព្រ័ត្រពានរង្វាន់សម្ដេច ក្រឡាហោម ដូចគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមស្នងការ ន.ប រាជធានីភ្នំពេញ

ក្រុមបាល់ទះស្នងការ ន.ប រាជធានីភ្នំពេញផ្នែកបុរសគឺមានសមត្ថភាពរីកចម្រើនខ្លាំងនៅឆ្នាំ២០២៦ នេះពិសេសនោះក្នុងការប្រកួតពានរង្វាន់សម្ដេច ក្រឡាហោម លើកទី៤ នេះតែម្ដង។ កីឡាករម្នាក់ៗលេងដោយមានទំនុកចិត្ត និងបច្ចេកទេសខ្ពស់មិនថាស្មាត់ អ្នកប៉ះសេ និងការធ្វើរនាំងនោះទេសុទ្ធតែធ្វើបានល្អទាំងព្រម។

ក្រុមស្នងការ ន.ប រាជធានីភ្នំពេញ

ការកើនឡើងសមត្ថភាពខ្លាំង និងទម្រង់លេងដ៏ល្អរបស់ក្រុមស្នងការ ន.ប រាជធានីភ្នំពេញបានទម្លាក់ក្រុមខ្លាំងៗជាច្រើនគិតត្រឹមវគ្គ ១៦ក្រុមចុងក្រោយឈ្នះ ត្បូងឃ្មុំ ៣-០ វគ្គ៨ក្រុមឈ្នះស្វាយរៀង ៣-០ វគ្គ៤ក្រុម ឬពាក់កណ្ដាលផ្ដាច់ព្រ័ត្រឈ្នះ វិសាខា ៣-០។ ការទម្លាក់ក្រុមស្វាយរៀងដែលជាម្ចាស់ពានឆ្នាំចាស់សំបូរកីឡាករល្អៗដូចជា សួន ចាន់ណារ៉ូ និងការទម្លាក់វិសាខាម្សិលមិញនេះបានធ្វើឲ្យអ្នកគាំទ្រភ្ញាក់ផ្អើល និងទស្សទាយខុសច្រើនផងដែរ។

ជាមួយគ្នានេះដែរក្រុមបាល់ទះនារី ស្នងការ ន.ប រាជធានីភ្នំពេញ ក៏ខ្លាំងមិនធម្មតាដែរ ពោលយកឈ្នះម្ចាស់ពានរង្វាន់ឆ្នាំចាស់គឺមន្ទីរអប់រំ ខេត្តពោធិ៍សាត់ ៣-០ ឡើងទៅវគ្គផ្ដាច់ព្រ័ត្រមិនឲ្យចាញ់ផ្នែកបុរសនោះឡើយ។

ក្រុមស្នងការ ន.ប រាជធានីភ្នំពេញ ផ្នែកនារី

បញ្ជាក់ដែរថា វគ្គព្រ័ត្រពានរង្វាន់សម្ដេច ក្រឡាហោម លើកទី៤ ឆ្នាំ២០២៦ នេះនឹងធ្វើឡើងនៅថ្ងៃអាទិត្យ ទី១ ខែមីនា នៅក្នុងវិមានពហុកីឡដ្ឋានជាតិ។ វគ្គផ្ដាច់ព្រ័ត្រផ្នែកនារីគឺក្រុមស្នងការ ន.ប រាជធានីភ្នំពេញ ប៉ះក្រុមអកសមុទ្រ វេលាម៉ោង ៤ល្ងាច។ ចំណែកវគ្គផ្ដាច់ព្រ័ត្រផ្នែកបុរសគឺស្នងការ ន.ប រាជធានីភ្នំពេញ ប៉ះ ស្នងការ ន.ប ខេត្តកោះកុង វេលាម៉ោង ៦ល្ងាចតទៅ។ អ្នកចង់ទៅទស្សនាផ្ទាល់អាចអញ្ជើញចូលរួមបានដោយសេរីមិនមានលក់សំបុត្រអ្វីឡើយ៕