កីឡា

ម៉ី ម៉ី ដឹងច្បាស់ពីការលំបាករបស់កីឡាការិនីទើបមានក្ដីស្រមៃចង់បើកក្លឹបបាល់ទះសម្រាប់នារីៗនៅថ្ងៃអនាគត

បានផុស

៣ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

អតីតលីប្រូរបស់ក្រុមបាល់ទះក្រសួងមហាផ្ទៃ កញ្ញា ម៉ី ម៉ី ដឹងច្បាស់ពីការលំបាកផ្សេងៗរបស់កីឡាការិនីក្នុងការហ្វឹកហាត់ដោយមិនមានក្លឹបដាច់ដោយឡែក និងត្រូវហ្វឹកហាត់ជាមួយបុរសៗទើបមានក្ដីស្រមៃចង់បើកក្លឹបសម្រាប់តែនារីៗមួយនៅកម្ពុជានាថ្ងៃអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា ម៉ី ម៉ី ពេលប្រកួតបាល់

កញ្ញា ម៉ី ម៉ី បានឲ្យដឹងថា បើទោះជាឥលូវនេះរវល់ និងត្រូវដកឃ្លាចេញពីវិស័យកីឡាបាល់ទះមួយរយៈពេលយ៉ាងណាក្ដី ប៉ុន្តែចិត្តស្រឡាញ់រួមទាំងក្ដីស្រមៃនៅតែមានជានិច្ចជាមួយកីឡាមួយនេះ។ រូបគេនឹងព្យាយាមរកកន្លែងហ្វឹកហាត់បន្តនៅអូស្ត្រាលី។

កញ្ញា ម៉ី ម៉ី និងមិត្តរួមក្រុម

អតីតលីប្រូខាងលើនេះបន្ថែមទៀតថា ដោយសារតែមើលឃើញនៅកម្ពុជាពុំទាន់មានក្លឹបបាល់ទះដាច់ដោយឡែកបែបស្ដង់ដាសម្រាប់នារីៗនៅឡើយទេ ដូច្នេះនៅថ្ងៃអនាគតបើខ្លួនមានលទ្ធភាពគឺចង់បង្កើតឲ្យមានក្លឹបមួយនៅកម្ពុជា។ ការហ្វឹកហាត់របស់នារីគឺមិនដូច ឬមិនធ្ងន់ពេកដូចជាខាងបុរសៗនោះឡើយ ស្របពេលការហ្វឹកហាត់មួយចំនួនពិបាកសម្រាប់នារីសម្របខ្លួនផងដែរ។ ការហ្វឹកហាត់ ឬចំណុចមួយចំនួនទៀតក៏មានការលំបាកចំពោះនារីៗដែរ ដូច្នេះហើយទើបខ្លួនមានគំនិតចង់បង្កើតក្លឹបបែបស្ដង់ដានៅកម្ពុជាសម្រាប់តែកីឡាការិនីប៉ុណ្ណោះ។ រូបគេពិតជាចង់បង្កើនធនធានកីឡាការិនីឲ្យមានច្រើន និងប្រកបដោយសមត្ថភាពដើម្បីប្រកួតប្រជែងជាមួយបណ្ដាប្រទេសផ្សេងៗផងដែរ។ បច្ចុប្បន្ននេះផ្នែកបុរសគឺមើលឃើញថាមានភាពរីកចម្រើនហើយ ប៉ុន្តែខាងនារីគឺមិនទាន់មានភាពលេចធ្លោនោះឡើយទេ។

កញ្ញា ម៉ី ម៉ី និងមិត្តរួមក្រុម

បញ្ជាក់ដែរថា កញ្ញា ម៉ី ម៉ី ជាអតីតកីឡាការិនីលីប្រូនៃក្រុមបាល់ទះក្រសួងមហាផ្ទៃ។ រូបគេជាអ្នកដែលស្រឡាញ់វិស័យកីឡាបាល់ទះខ្លាំង និងធ្លាប់ហ្វឹកហាត់ច្រើនកាលនៅកម្ពុជា។ ដោយត្រូវបន្តការសិក្សាកញ្ញាក៏បានទៅប្រទេសអូស្ត្រាលីកាលពីចុងខែកុម្ភៈ ឆ្នាំ២០២៦ ហើយ៕