Manila Digger មានបេក្ខភាពប្រជែងស្បែកជើងមាសម្នាក់ អាចបង្កគ្រោះថ្នាក់ដល់ ព្រះខ័នរាជស្វាយរៀង

ក្រុមរបស់ ហ្វីលីពីន Manila Digger មានខ្សែបម្រើឆ្នើមម្នាក់ គឺកីឡាករ Pa Ousman Gai តែង​តែ​បង្ក​គ្រោះថ្នាក់ខ្លាំងដល់​ដៃ​គូ​ប្រកួត ហើយ​រូប​គេ​ធ្លាប់​ស៊ុត​ចូល ព្រះខ័នរាជស្វាយរៀង ២ គ្រាប់​កាល​វគ្គ​សន្សំពិន្ទុ​ក្នុង​ពូល ក្រុម​ទាំង​ពីរ​ជួប​គ្នា​ម្តង​ទៀត​ ក្នុងការប្រកួរវគ្គពាក់កណ្តាលផ្តាច់ព្រ័ត្រពានរង្វាន់ AFC Challenge League រដូវកាល ២០២៥-២០២៦។

ក្រុម Manila Digger នឹងត្រូវហោះមក កម្ពុជា ជាថ្មី ដើម្បីប្រកួតទល់ ព្រះខ័នរាជស្វាយរៀង ក្នុងជើងទី ១ វគ្គពាក់កណ្តាលផ្តាច់ព្រ័ត្រពាន ACGL នៅពហុកីឡដ្ឋានជាតិមរតកតេជោ ថ្ងៃទី ៩ ខែ មេសា ឆ្នាំ ២០២៦។ ចំណែកជើងទី ២ ត្រូវជួបគ្នានៅទឹកដី ហ្វីលីពីន ថ្ងៃទី ១៦ ខែ មេសា ឆ្នាំ ២០២៦។

យ៉ាងណា មុនជំនួបដ៏សំខាន់នេះមកដល់ ជឿជាក់ ថា អ្នកគាំទ្របាល់ទាត់ កម្ពុជា ប្រហែលជាស្គាល់សមាសភាពកីឡាកររបស់ក្រុម ហ្វីលីពីន មួយនេះខ្លះហើយ ដោយសារពួកគេធ្លាប់ជួប ព្រះខ័នរាជស្វាយរៀង នៅ កម្ពុជា ម្តងរួចហើយ អំឡុងការប្រកួតវគ្គចែកពូល ដោយពេលនោះពួកគេស្មើគ្នា ២-២។

ក្រុម Manila Digger មានសមាសភាពកីឡាករបរទេសល្អៗច្រើន ប៉ុន្តែមានម្នាក់ចាត់ទុកល្អបំផុតក្នុងក្រុម គឺខ្សែបម្រើសញ្ជាតិ ហ្គាំប៉ី កីឡាករ Pa Ousman Gai។ កីឡាកររូបនេះ លេងតួនាទីជាខ្សែបម្រើ ប៉ុន្តែរូបគេឈរជាកីឡាករស៊ុតបញ្ចូលទីច្រើនជាងគេប្រចាំក្រុមគ្រប់កម្មវិធីនៅរដូវកាលនេះ។

នៅក្នុងលីគកំពូល ហ្វីលីពីន កីឡាករវ័យ ២៦ ឆ្នាំរកបាន ១៥ គ្រាប់។ ចំណែកនៅពានរង្វាន់ AFC Challenge League វិញ Gai រកបាន ៥ គ្រាប់ ស្ថិតនៅចំណាត់ថ្នាក់លេខ ៣ ក្រោម Moses Dyer របស់ ភ្នំពេញក្រោន ដែល​មាន ៧ គ្រាប់ និង Kwame Peprah ​របស់​ព្រះខ័ន​រាជ​ស្វាយរៀង ដែល​មាន ៦ គ្រាប់។

នៅក្នុងពាន ACGL រដូវកាលនេះ Gai រកបានគ្រាប់បាល់ ចំពោះក្រុមដែលគេបានលេងតទល់ទាំងអស់។ ក្នុងវគ្គជម្រុះក្នុងពូល ខ្សែបម្រើរូបនេះរកបាន ១ គ្រាប់ទល់នឹង Ezra FC, ១ គ្រាប់ទល់នឹង SP Falcons និង ២ គ្រាប់ទល់ ព្រះខ័នរាជស្វាយរៀង។ ចំណែកនៅវគ្គ ៨ ក្រុមចុងក្រោយ រូបគេរកបាន ១ គ្រាប់ទល់នឹង Dewa United។

ក្រៅពីការស៊ុតបញ្ចូលទី Gai ក៏មានការបង្កើតឱកាសរកគ្រាប់បាល់ជូនមិត្តរួមក្រុមផងដែរ ដោយនៅក្នុងលីគរូបគេធ្វើបាន ៥ លើក និងនៅក្នុងពាន ACGL កីឡាករធ្វើបាន ២ លើក៕

អត្ថបទ៖ សេម កុសល