កីឡា

ក្នុងសម័យកូវីដ អ្នកគាំទ្រអាមេរិកចូលមើលប្រដាល់បំបែកកំណត់ត្រាជាង៤០ឆ្នាំ

បានផុស

១ ខែ មុន

នៅ

ថ្ងៃចន្ទ ១០ ឧសភា ២០២១

ដោយ

ការប្រកួតប្រដាល់សកលដណ្តើមខ្សែក្រវាត់ពិភពលលោក ដែលជើងខ្លាំង Canelo Alvarez បានបញ្ឈប់ Billy Joe Saunders នៅយប់ថ្ងៃសៅរ៍ ត្រូវនឹងព្រឹកថ្ងៃអាទិត្យ ម្សិលមិញនេះមានអ្នកចូលទស្សនាផ្ទាល់រហូតដល់ ៧៣ ១២៦នាក់ នៅសង្វៀន AT&T Stadium ក្នុងរដ្ឋតិចសាស សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់វត្តមានអ្នកគាំទ្រចូលទស្សនាផ្ទាល់នៅក្នុងព្រឹត្តិការណ៍ប្រដាល់សកលនៅសហរដ្ឋអាមេរិកត្រូវបានចាត់ទុកថា ជាប្រវត្តិសាស្ត្រលើកដំបូងដែលមានមនុស្សច្រើនបំផុតក្នុងរយៈពេល៤៣ឆ្នាំចុងក្រោយនេះ បន្ទាប់ពីកំណត់ត្រាកាលពីឆ្នាំ១៩៧៨នៅពេលដែលស្តេចប្រដាល់អាមេរិក Muhammad Ali ផ្តួលកីឡាករ Leon Spinks នៅចំពោះមុខអ្នកទស្សនាផ្ទាល់ ៦៣ ៣៥២នាក់។

វាក៏ជាការបំបែកកំណត់ត្រាមនុស្សច្រើនបំផុតគ្រប់សម័យកាលនៅក្នុងព្រឹត្តិការណ៍ប្រដាល់នៅសហរដ្ឋអាមេរិក។

ចាប់តាំងពីឆ្នាំ១៩៧៨នោះមក មានការប្រកួតប្រដាល់សកលពិភពលោកជាច្រើន និងមានកីឡាករល្បីៗបានឡើងប្រកួតនៅសង្វៀនល្បីៗនៅសហរដ្ឋអាមេរិក ប៉ុន្តែមិនមានវត្តមានអ្នកគាំទ្របំបែកកំណត់ត្រាច្រើនបំផុតពិភពលោកនោះទេ។

ប៉ុន្តែបែរជាមានមនុស្សចូលទស្សនាច្រើនបំផុតបំបែកកំណត់ត្រានៅក្នុងអន្តរកាលនៃជំងឺកូវីដ-១៩ដែលសហរដ្ឋអាមេរិកជាកន្លែងឆ្លង និងស្លាប់ច្រើនជាងគេបំផុតក្នុងពិភពលោក ហើយក៏មិនទាន់ស្ងប់ស្ងាត់ទាំងស្រុងដែរ។ យ៉ាងណា សហរដ្ឋអាមេរិកបានធ្លាក់ចុះច្រើនណាស់ប្រហែលជាពីរខែចុងក្រោយនេះដែលកត្តាសំខាន់មកពីយុទ្ធនាការណ៍ចាក់វ៉ាក់សាំង។

និយាយពីការប្រកួតកាលពីម្សិលមិញវិញ ជើងខ្លាំងម៉ិកស៊ិក Canelo Alvarez នៅចំពោះមុខអ្នកគាំទ្រជាង៧ម៉ឺននាក់បានយកឈ្នះកីឡាករអង់គ្លេស Billy Joe Saunders នៅត្រឹមទឹកទី៨ បន្ទាប់ពីរបួសធ្ងន់ដោយលោកអាជ្ញាកណ្តាលបញ្ឈប់ការប្រកួត។

សម្រាប់ជ័យជម្នះនេះ Canelo Alvarez ការពារខ្សែក្រវាត់ពិភពលោក WBA (Super) របស់ខ្លួនបានជោគជ័យ និងបានឈ្នះខ្សែក្រវាត់ពិភពលោក WBO បន្ថែមមួយគ្រឿងទៀតពីកីឡាករ Billy Joe Saunders៕

ប្រែសម្រួល៖ វីរបុត្រ
ប្រភព៖ CNN