លោកជំទាវ ពេជ ចន្ទមុន្នី៖ ពេលកូនឈឺ ម្ដាយឳពុកភ័យណាស់ ទោះពេទ្យនៅឆ្ងាយ យប់ជ្រៅប៉ុណ្ណា ក៏បញ្ជូនទៅដែរ ព្រោះជីវិតកូន ជាទ្រព្យមិនអាចកាត់ថ្លៃបានឡើយ

លោកជំទាវបណ្ឌិត ពេជ  ចន្ទមុន្នី ហ៊ុនម៉ាណែត ប្រធានកិត្តិយស នៃមូលនិធិគន្ធបុប្ផាកម្ពុជា ថ្លែងថា នៅពេលដែលកូនរបស់ខ្លួនឈឺមិនថាជំងឺធ្ងន់ធ្ងរ ឬស្រាល ក្នុងនាមជា​ឳពុកម្ដាយ គឺព្រួយបារម្ភខ្លាំងណាស់ ហើយបើទោះបីជាយប់ជ្រៅប៉ុណ្ណាក៏ដោយ មន្ទីរពេទ្យពេទ្យនៅឆ្ងាយប៉ុណ្ណាក៏ដោយ ក៏ត្រូវតែបញ្ជូនទៅកូនព្យាបាលភ្លាមដែរ មិនបង្អង់យូរឡើយ ព្រោះតែអាយុជីវិតរបស់កូនគឺជាទ្រព្យសម្បត្តិមួយមិនអាចកាត់ថ្លៃបាន ឬយកអ្វីទៅទិញដូរបានឡើយ។ លោកជំទាវបណ្ឌិត ថ្លែងដូច្នេះ នៅក្នុងពិធីបើកយុទ្ធនាការ«១ម៉ឺនរៀល ១ម៉ឺននាក់» នាព្រឹកថ្ងៃទី១ ខែមិថុនា នេះ។

លោកជំទាវបណ្ឌិត ពេជ ចន្ទមុន្នី ថ្លែងដូច្នេះ៖«ក្នុងនាមខ្ញុំដែលម្ដាយមួយរូបប្រាកដជាយល់ច្បាស់ណាស់ថា សុខភាពរបស់កូនគឺជាទ្រព្យសម្បត្តិដ៏មហាសាល ហើយមិនអាចកាត់ថ្លៃបានរបស់គ្រប់ៗគ្រួសារ ហើយគ្មានក្ដីបារម្ភណាមួយស្មើនឹងក្ដីបារម្ភនៅពេលដែលកូនៗរបស់យើងឈឺឬក៏មានជំងឺនោះទេ។»។

លោកជំទាវបណ្ឌិតស្រីទី១ នៅកម្ពុជា ថ្លែងបន្តថា៖«ក្នុងនាមជាឪពុកម្ដាយនៅពេលកូនៗរបស់យើងឈឺ ម្ដាយឳពុកព្រួយបារម្ភ លះបង់គ្រប់បែបយ៉ាង ធ្វើយ៉ាងណាឲ្យតែកូនបានជា ខិតខំរកគ្រូពេទ្យដែលជំនាញៗ ហើយស៊ូទ្រាំអត់ងងុយ។ »។

លោកជំទាវបណ្ឌិតបន្ថែមថា នៅពេលដែលកូនៗឈឺម្ដងៗ ម្ដាយឳពុកស៊ូទ្រាំអត់ងងុយ លះបង់គ្រប់យ៉ាង លះបង់ទាំងសុខភាពខ្លួនឯង ដើម្បីឱ្យកូនឆាប់បានជាសះស្បើយពីជំងឺ។

លោកជំទាវបណ្ឌិត ពេជ ចន្ទមុន្នី ហ៊ុន​ម៉ាណែត ប្រធានកិត្តិយសមូលនិធិគន្ធបុប្ផាកម្ពុជា មើលឃើញថា មន្ទីរពេទ្យគន្ធបុប្ផា គឺជាមន្ទីរពេទ្យមួយបានជួយព្យាបាលជំងឺរបស់កុមារមកពីគ្រប់រាជធានី ខេត្តក្នុងប្រទេសកម្ពុជា ព្រោះនៅពេលកូន ចៅ ឈឺមានជំងឺធ្ងន់ស្រាល ឳពុកម្ដាយ ជីដូនជីតា ដែលរស់នៅតាមខេត្តបានបញ្ជូនកូនចៅខ្លួន មកព្យាបាលនៅមន្ទីរពេទ្យគន្ធបុប្ផាភ្លាម។

លោកជំទាវបណ្ឌិតស្រ្តីទី១ ថ្លែងពីការមើលឃើញដូច្នេះ​៖«ឳពុកម្ដាយ ជីដូនជីតា របស់កុមារកម្ពុជាយើងដែលឈឺនេះ បានធ្វើដំណើរមកពីគ្រប់ខេត្តក្រុងនៅក្នុងប្រទេស គឺដើម្បីយកកូនៗចៅៗ មកព្យាបាលនៅមន្ទីរពេទ្យគន្ធបុប្ផាទាំងនៅរាជធានីភ្នំពេញ ហើយនៅខេត្តសៀមរាប។ ពួកគាត់សុខចិត្តងើបតាំងពីព្រឹក ម៉ោង៣ភ្លឺ ៤ភ្លឺ ៥ភ្លឺ ដើម្បីឈរចាំយកលេខ គឺធ្វើយ៉ាងណាដើម្បីឱ្យកូនៗចៅៗរបស់គាត់ បានចូលទៅពិនិត្យមុនគេ នៅពេលមន្ទីរពេទ្យបើក គ្រូពេទ្យមកធ្វើការ។ នេះហើយជាការព្រួយបារម្ភរបស់ឳពុកម្ដាយគ្រប់រូប! »។

លោកជំទាវបន្ថែមថា មន្ទីរពេទ្យគន្ធបុប្ផាបានបំពេញតួនាទី ក្នុងការជួយសម្រាលក្ដីព្រួយបារម្ភរបស់ម្ដាយឳពុករាប់សែននាក់ចំពោះសុខទុក្ខរបស់កូនៗខ្លួន។

គួរឱ្យដឹងថា  តាំងតែពីមន្ទីរពេទ្យគន្ធបុប្ផា ចាប់ផ្តើមដំណើរការឡើងវិញនៅឆ្នាំ១៩៩២, មន្ទីរពេទ្យនេះបានទទួលការពិនិត្យ និងព្យាបាលនៅផ្នែកពិគ្រោះជំងឺក្រៅ កុមារ និងស្រ្តីមានផ្ទៃពោះចំនួនប្រមាណ ២៣ លានករណី, បានទទួលកុមារមកសម្រាកព្យាបាលធ្ងន់ធ្ងរប្រមាណ ២,៨ លាននាក់ និងសម្រាលកូនជូនស្រ្តីមានផ្ទៃពោះចំនួនប្រមាណ ៤១ម៉ឺននាក់។ មន្ទីរពេទ្យគន្ធបុប្ផាទាំងនៅភ្នំពេញ និងនៅខេត្តសៀមរាប ត្រូវចំណាយថវិកាជាង១២ម៉ឺនដុល្លារក្នុង១ថ្ងៃ ឬក៏៤៣លានដុល្លារអាមេរិកក្នុង១ឆ្នាំ ដើម្បីធានារក្សានិរន្តភាពមន្ទីរពេទ្យក្នុងការជួយព្យាបាលជំងឺ ដើម្បីពិនិត្យព្យាបាលជំងឺកុមារ និងពិនិត្យលើស្ត្រីមានផ្ទៃពោះដោយឥតគិតថ្លៃ ប្រកបដោយស្មើភាព គ្មានការរើសអើង។

ដើម្បីមើលឃើញពីតម្រូវការថវិកា ទ្រទ្រង់និរន្តភាពដំណើរការមន្ទីរពេទ្យ នៅឆ្នាំ២០២៥ នេះ  លោកជំទាវបណ្ឌិត ពេជ ចន្ទមុន្នី បានបន្ដគំនិតផ្ដួចផ្ដើមបើក យុទ្ធនាការ «១ម៉ឺនរៀល ១ម៉ឺននាក់» រយៈពេលពេញ១ខែមិថុនា ដើម្បីកៀរគរថវិកាសប្បុរសធម៌ ចូលរួមចំណែកដល់កិច្ចដំណើរការនៃមន្ទីរពេទ្យគន្ធបុប្ផា និងចូលរួមអបអរសាទរ ទិវាកុមារអន្តរជាតិ ១មិថុនា និងបំផុសស្មារតី “ខ្មែរជួយខ្មែរ” ក៏ដូចជាការរម្លឹក ឱ្យមានការចូលរួមបរិច្ចាគជូនមូលនិធិគន្ធបុប្ផាកម្ពុជា ដើម្បីផ្ដល់ក្តីសង្ឃឹមដល់ទារក និងកុមារនៅកម្ពុជា។

លោកជំទាវបណ្ឌិត ពេជ ចន្ទមុន្នី ថ្លែងថា ត្បិតការកៀរគរថវិកាដើម្បីជួយដល់មន្ទីរពេទ្យគន្ធបុប្ផា ដាក់ឈ្មោះថាជាយុទ្ធនាការ «១ម៉ឺនរៀល ១ម៉ឺននាក់» ក៏ពិតមែន ប៉ុន្តែសប្បុរសជនក៏អាចបរិច្ចាគថវិកាលើសពី១ម៉ឺនរៀលបានដែរ៕