អង់គ្លេស ប្រាប់អ្នកគាំទ្រ អ៊ីតាលី កុំឲ្យមកទស្សនាវគ្គផ្ដាច់ព្រ័ត្របាល់ទាត់យូរ៉ូ

រដ្ឋមន្រ្តីដឹកជញ្ជូនអង់គ្លេសលោក Grant Shapps បានប្រាប់អ្នកគាំទ្របាល់ទាត់អ៊ីតាលី កុំព្យាយាមធ្វើដំណើរទៅកាន់ប្រទេសអង់គ្លេស សម្រាប់ការប្រកួតផ្តាច់ព្រ័ត្រនៃព្រឹត្តិការណ៍យូរ៉ូ ឆ្នាំ ២០២០ នៅថ្ងៃអាទិត្យនេះ ។

នៅថ្ងៃអាទិត្យនេះ ក្រុមបាល់ទាត់ជម្រើសជាតិតោកំណាចអង់គ្លេស នឹងជួបអ៊ីតាលីនៅវគ្គផ្តាច់ព្រ័ត្របាល់ទាត់យូរ៉ូ នៅពហុកីឡដ្ឋាន Wembley នាទីក្រុងឡុងដ៍ ខណៈគេរំពឹងថានឹងអនុញ្ញាតឲ្យមានអ្នកចូលទស្សនាប្រហែល ៦០,០០០ នាក់ ។

ប៉ុន្តែអ្នកគាំទ្រអ៊ីតាលីអាចនឹងមានចំនួនតិចបំផុត ដោយសារច្បាប់ធ្វើដំណើររបស់អង់គ្លេស តម្រូវឲ្យអ្នកធ្វើដំណើរមកពីប្រទេសនោះ ត្រូវធ្វើចត្តាឡីស័ករយៈពេល ១០ ថ្ងៃ ។

នៅពេលត្រូវបានអ្នកសារព័ត៌មានសួរថាតើ លោកនឹងនិយាយអ្វីទៅអ្នកគាំទ្រអ៊ីតាលី ដែលព្យាយាមចូលមកប្រទេសនេះ ដើម្បីទស្សនាការប្រកួតវគ្គផ្ដាច់ព្រ័ត្រ លោក Shapps បាននិយាយថា “ទេ! ខ្ញុំមិនឆ្លើយសំណួរដ៏សាមញ្ញនេះនោះទេ” ។

លោកបានប្រាប់វិទ្យុ Times Radio ថា “ប្រសិនបើយើងរកឃើញថា មនុស្សចូលមកទស្សនាបាល់ទាត់ ពួកគេនឹងមិនត្រូវបានអនុញ្ញាតនោះទេ ហើយជើងហោះធម្មតា និងជើងហោះហើរត្រង់ជាច្រើន ត្រូវបានលុបចោលដោយផ្អែកលើមូលដ្ឋានទាំងនោះ” ។

អង់គ្លេស មិនបានឈានដល់វគ្គផ្តាច់ព្រ័ត្រ ក្នុងព្រឹត្តិការណ៍បាល់ទាត់ធំៗណាមួយឡើយ ចាប់តាំងពីឈ្នះជើងឯក World Cup តែម្ដងគត់ក្នុងឆ្នាំ ១៩៦៦ ។

ចំណែកនៅព្រឹត្តិការណ៍បាល់ទាត់យូរ៉ូ  ឆ្នាំ ២០២១ នេះ ប្រទេសអង់គ្លេសបានឈានដល់វគ្គផ្តាច់ព្រ័ត្រ បន្ទាប់ពីបានទម្លាក់ក្រុមដាណឺម៉ាក ក្នុងម៉ោងបន្ថែម ១៥ នាទីពីរដង ដោយលទ្ធផល ២-១ ខណៈអ៊ីតាលីបានយកឈ្នះអេស្ប៉ាញ ដោយបាល់ប៉េណាល់ទី ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ជប់លៀង​ពេញ​ប្រទេស ខណៈ អង់គ្លេស ចារប្រវត្តិសាស្ត្រ​ដំបូង​ដល់​វគ្គ​ផ្តាច់ព្រ័ត្រ Euro