កីឡា

ជំនួបរវាង Rodtang និង Williams ក្លាយជាការប្រកួតល្អបំផុតប្រចាំឆ្នាំ ២០២១ នៅ ONE

បានផុស

៥ years មុន

នៅ

ថ្ងៃសុក្រ ៣១ ធ្នូ ២០២១

ដោយ

រយៈពេល ១២ ខែកន្លងទៅនេះ មានការប្រកួតឃីកបុកសីង និងមួយថៃជាច្រើនគូ ដែលទទួលបានការចាប់អារម្មណ៍យ៉ាងខ្លាំង នៅស្ថាប័នប្រដាល់ធំបំផុតក្នុងពិភពលោក ONE Championship។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតជំនាញមួយថៃ និងឃីកបុកសីងហៅថា ONE Super Series ដែលមានកីឡាករ និងកីឡាការិនីឆ្នើមៗទូទាំងពិភពលោក។ អ្នកខ្លះទើបលេចមុខប្រកួតថ្មី អ្នកខ្លះបានឈ្នះខ្សែក្រវាត់ពិភពលោក ហើយអ្នកខ្លះបានឡើងចំណាត់ថ្នាក់ក្នុងតារាងប្រភេទទម្ងន់។

ប៉ុន្តែក្នុងចំណោមគូប្រកួតជាច្រើនរយៈពេល ១២ ខែកន្លងទៅនេះ មានការប្រកួតមួយថៃរវាងមនុស្សដែក Rodtang Jitmuangnon និង Danial Williams នៅសមរភូមិ ONE on TNV I កាលពីថ្ងៃទី៧ ខែមេសា បានក្លាយជាការប្រកួតជក់ចិត្ត និងគួរឲ្យចាប់អារម្មណ៍បំផុត។

ប្រកួតក្នុងតំណែងគូឯក ដែលផ្សាយបន្តផ្ទាល់ទៅសហរដ្ឋអាមេរិកចំម៉ោងមាស អ្នកប្រដាល់រឹងមាំ Rodtang បានបង្កើតការចាប់អារម្មណ៍ខ្លាំងបំផុត។ មិនត្រឹមតែកំពុងគ្រប់គ្រងខ្សែក្រវាត់មួយថៃពិភពលោក ONE Flyweight ជាមួយនឹងកំណត់ត្រាឡើងប្រកួត ៩ ដង នៅសង្វៀន ONE ដោយទទួលបានជ័យជម្នះទាំងអស់ រូបគេថែមទាំងបានឈ្នះការប្រកួតឃីកបុកសីងថែមទៀតលើកីឡាករ Tagir Khalilov មុន ២ ខែ។

កីឡាករអូស្ត្រាលី Williams ទើបបង្ហាញខ្លួនប្រកួតលើកដំបូងនៅ ONE និងប៉ះជើងឯកពិភពលោកតែម្តង។ ប៉ុន្តែរូបគេមានបទពិសោធច្រើនក្នុងការប្រកួតមួយថៃ និងធ្លាប់ឈ្នះជើងឯកមួយថៃ WMC ព្រមទាំងជាជើងឯកអូស្ត្រាលីច្រើនលើកទៀតផង។ មនុស្សច្រើនណាស់គិតថា Williams មិនសមប្រកួតជាមួយមនុស្សដែកថៃឡើយ ប៉ុន្តែការពិតនៅលើសង្វៀនបង្ហាញថា កីឡាករអូស្ត្រាលីម្នាក់នេះមិនមែនជាដំឡូងមូល ឬជាប៉ាវសាក់របស់ Rodtang ទេ។

ស្ថិតក្នុងទម្ងន់ ៦១.៥ គីឡូក្រាម ជើងខ្លាំងទាំងពីរហាក់គ្មាននរណាម្នាក់រត់ថយក្រោយឡើយ ប៉ុន្តែប្រឈមមុខដាក់គ្នាជាមួយកណ្តាប់ដៃ រន្ទះជើង ផ្លែកែង និងជង្គង់ដូចព្យុះចាប់ពីទឹកទី ១ រហូតដល់ទឹកទី៣។ ការប្តូរអាវុធគ្នាបានធ្វើឲ្យកីឡាករអូស្ត្រាលីទទួលកណ្តាប់ដៃច្រើន និងបែកឈាមថែមទៀត ប៉ុន្តែរូបគេមិនចុះញមទេពោលគឺតតាំងរហូតចប់ការប្រកួត បើទោះជា Rodtang គ្របដណ្តប់ច្រើន។

វាបានក្លាយជាការប្រកួតដ៏ជក់ចិត្ត ដិតអារម្មណ៍ និងគួរឲ្យចង់ទស្សនាសម្រាប់រយៈពេល៣ទឹក ហើយទីបំផុតចៅក្រុមទាំង៣រូបបានកាត់សេចក្តីឲ្យកីឡាករថៃឈ្នះដោយពិន្ទុប៉ុណ្ណោះ។

បំណាច់ឆ្នាំចូលមកដល់ គណកម្មការរៀបចំការប្រកួតបានពិនិត្យ និងវាយតម្លៃមើលការប្រកួត ONE Super Series គូនីមួយៗ ឃើញថា ជំនួបរវាង Rodtang និង Williams ល្អជាងគេដែលសក្តិសមក្លាយជាការប្រកួតល្អបំផុតប្រចាំ២០២១នៅស្ថាប័ន ONE៕

Related Topics:កីឡាប្រដាល់