អតីតស្ដេចប្រដាល់ពិភពលោក ម៉ៃ ថៃសាន់ បើកបង្ហាញផ្ទះប្រណីត ឃើញហើយពិតជាហៃសូ មិនធម្មតា

សារព័ត៌មាន New York Post ថ្មីៗនេះ បានបើកបង្ហាញពីឆាកជីវិតរបស់ ម៉ៃ ថៃសាន់ អតីតម្ចាស់ជើងឯកពិភពលោក​ទម្ងន់​ធ្ងន់ ក្នុងនោះគេបានបង្ហាញពីផ្ទះមួយ​នៅ Las Vegas មានតម្លៃ ២.៥ លានដុល្លារ ដែល​គាត់​បាន​ទិញ​កាល​ពី​ឆ្នាំ ២០១៥ បន្ទាប់ពី​បាន​ចូល​និវត្តន៍។

មានទីតាំងនៅទីក្រុង Henderson រដ្ឋ Nevada ភូមិគ្រិះពីរជាន់នេះ​ មានទំហំ ៨,១៤៩ ហ្វីតការ៉េ ធំជាងផ្ទះរបស់គាត់​ដែលធ្លាប់ប្រើក្នុងរឿង The Hangover ដ៏ល្បីល្បាញ។ ភូមិគ្រិះដ៏ប្រណិតនេះ​ រួមមាន​បន្ទប់គេង ៦ ផ្ទះ​បាយ​ធំទូលាយ បន្ទប់​ទទួល​ភ្ញៀវមួយ អាងទឹកធម្មតា និង​អាងហែល​ទឹក​បែបរមណីយដ្ឋាន​វែង។ ក្នុង​នោះ​បន្ទប់​មេ​ អាចបាន​និយាយ​ថា ​ប្រណិត​ខ្លាំង ជាមួយ​រចនាប័ទ្ម​មេឌីទែរ៉ាណេ មានអាងងូតទឹកដ៏ធំមួយ ដែលមើលពីខាងក្រៅ។

លើសពីនេះ តំបន់ជុំវិញផ្ទះក៏មានទីលានវាយកូនហ្គោលដ៏ល្បីល្បាញ Seven Hills ដែលនឹងផ្តល់សេវាកម្មឯកជន​សម្រាប់អ្នករស់នៅក្នុងភូមិគ្រិះនេះតែប៉ុណ្ណោះ។ វាមិនឆ្ងាយពីទីក្រុង Las Vegas ទេ វាចំណាយពេលត្រឹមតែ ១០ នាទីប៉ុណ្ណោះ។

គួរបញ្ចាក់ថា អតីតម្ចាស់ខ្សែក្រវាត់ទម្ងន់ធ្ងន់ពិភពលោក​ ដែលមាន​ ៣ ស្ថាប័ន (WBA, WBC និង IBF) មានកំណត់ត្រាប្រកួតចំនួន ៥៨ ដង ក្នុងនោះឈ្នះ ៥០ដង ផ្តួលដៃគូឲ្យសន្លប់ ៤៤ ដង ចាញ់ ៦ ដង និងគ្មានចៅក្រមពីរដង មុននឹងសម្រេចចិត្តចាកចេញពីសង្វៀនក្នុងឆ្នាំ ២០០៥ ដែល​តាម​រយៈ​កណ្តាប់ដៃនេះ ​ត្រូវ​បាន​គេ​រាយការណ៍​ថា​ រក​បាន​រហូត​ដល់ ៤០០លាន​ដុល្លារ៕

ប្រែសម្រួល៖ សាង ស្រីល័ក្ខ

ចុចអាន៖Ronaldo បង្ហាញរូបថតជុំគ្រួសារលើកដំបូង ក្រោយបាត់បង់កូនប្រុស

ចុចអាន៖អតីតម្ចាស់ក្លឹប Chelsea កំពុងសំងំលាក់ខ្លួននៅប្រទេសមួយ​ ក្នុងប្លុក ណាតូ