លក្ខណៈពិសេសនៃ មេដាយ ដែល វៀតណាម ផលិតសម្រាប់ ស៊ីហ្គេម ខែក្រោយ

គណៈកម្មការរៀបចំការប្រកួតកីឡាអាស៊ីអាគ្នេយ៍ (ស៊ីហ្គេម) លើកទី៣១ បានបញ្ជាក់កាលពីថ្ងៃអាទិត្យទី២៤ខែមេសាថា ខ្លួនបានបញ្ចប់ការរចនាគំរូមេដាយ ហើយបានចាប់ផ្តើមផលិតមេដាយចំនួន ៤០០០ គ្រឿងដើម្បីត្រៀមសម្រាប់ព្រឹត្តិការណ៍ដ៏ធំនៅខែក្រោយ។

មេដាយ​ស៊ីហ្គេម​លើក​ទី​៣១នេះ ផលិត​ពី​ស្ពាន់​ស័ង្កសី ដោយក្នុង​នោះ​ស្ពាន់​ក្រហម​មាន​ប្រមាណ ៨៥​ភាគរយ។

មេដាយនីមួយៗ មានកម្រាស់ ៥មិល្លីម៉ែត្រជាមួយនឹងរូបម៉ាស្កូត Saola នៅម្ខាង និងឡូហ្គោ ស៊ីហ្គេម នៅម្ខាង។

មេដាយមាសនឹង ជ្រលក់ជាមួយមាស ២៤ ការ៉ាត់។ ដូច​គ្នានេះ​ដែរ មេដាយ​ប្រាក់​នឹងជ្រលក់ជាមួយ​ប្រាក់ ហើយ​មេដាយ​សំរឹទ្ធ​នឹង​ត្រូវ​បានជ្រលក់​ដោយ​សំរិទ្ធ។

រីឯសម្រាប់ភាពធន់វិញគឺកាន់តែប្រសើរ, មេដាយនីមួយៗនឹងមានស្រទាប់ចំនួនបួនបន្ថែមទៀត។ ខ្សែ​នៃ​មេដាយ​ នឹង​ត្រូវ​បាន​ដេរ​ដោយ​ក្រណាត់​ត្បាញ​ជំនួស​ឲ្យ​ការ​ផលិត​ពី​សូត្រ ឬ​សាតាំង។

គួរបញ្ជាក់ថា ស៊ីហ្គេមលើកទី៣១ នឹងប្រព្រឹត្តទៅនៅទីក្រុងហាណូយ និងខេត្ត-ក្រុងជិតខាងចំនួន ១១ ចាប់ពីថ្ងៃទី ១២ ដល់ថ្ងៃទី ២៣ ខែឧសភា។

ពីដំបូង ព្រឹត្តិការណ៍នេះ បានកំណត់រៀបចំចាប់ពីថ្ងៃទី ២១ ខែវិច្ឆិកាដល់ថ្ងៃទី ២ ខែធ្នូ ឆ្នាំ ២០២១ ប៉ុន្តែត្រូវបានពន្យារពេលចាប់តាំងពីប្រទេសវៀតណាម ត្រូវប្រឈមមុខនឹងការផ្ទុះឡើងនៃជំងឺកូវីដ១៩ នៅចុងខែមេសាឆ្នាំនោះ។

ព្រឹត្តិការណ៍កីឡានេះ នឹងមានការចូលរួមពីគណៈប្រតិភូមកពីប្រទេសអាស៊ីអាគ្នេយ៍ទាំង១១ និងមាន ៥២៦ ក្នុង ៤០ ប្រភេទកីឡា។

អត្តពលិក គ្រូបង្វឹក និងសមាជិកនៃគណៈប្រតិភូកីឡាចំនួន ៧៨៧៨ នាក់ បានចុះឈ្មោះសម្រាប់ព្រឹត្តិការណ៍នេះ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ កម្ពុជា រំពឹងឈ្នះមេដាយមាសលើប្រភេទកីឡា ៤ ក្នុងព្រឹត្តិការណ៍កីឡាស៊ីហ្គេមនៅវៀតណាមឆ្នាំនេះ