កីឡា

លោក Conor Nestor ជុំវិញកំណត់ត្រាមិនដែលចាញ់នៅលីគកំពូលកម្ពុជា ១៣ ប្រកួតជាប់ៗគ្នា

បានផុស

៤ years មុន

នៅ

ថ្ងៃចន្ទ ១ សីហា ២០២២

ដោយ

ក្លិបបាល់ទាត់ព្រះខ័នរាជស្វាយរៀង បានយកឈ្នះ ក្លិបបាល់ទាត់អង្គរថាយហ្គឺរ ក្នុងការប្រកួតសប្ដាហ៍ទី ១៣ នៃពានរង្វាន់ខេមបូឌានព្រីមៀរលីគ (Cambodian Premier League) ឆ្នាំ ២០២២ ដោយលទ្ធផល ០-៤ កាលពីម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

៤ គ្រាប់របស់ព្រះខ័នរាជស្វាយរៀង រកបានដោយកីឡាករ Marcus Haber ១ គ្រាប់នៅនាទី ៨, កីឡាករ Victor Blasco ១ គ្រាប់នៅនាទី ៦៧ ដោយបាល់ពិន័យ ១១ ម៉ែត្រ និង ២ គ្រាប់ចុងក្រោយនៅម៉ោងបន្ថែម ៩០+២ ដោយកីឡាករ មិន រតនៈ និងនាទី ៩០+៥ ដោយកីឡាករ ប្រាក់ មុន្នីឧត្តម ដែលនេះ គឺជាការរក្សាកំណត់ត្រាមិនដែលចាញ់ ១៣ ប្រកួតជាប់ៗគ្នារបស់ក្លិបមានមូលដ្ឋាននៅខេត្តស្វាយរៀងមួយនេះ។

លោក Conor Nestor បាននិយាយក្រោយចប់ការប្រកួតថា៖ «យើងសប្បាយចិត្តនឹងលទ្ធផល។ វាជាការប្រកួតមួយដែលយើងផ្តល់ការគោរពយ៉ាងខ្លាំងដល់ថាយហ្គឺរ (អង្គរថាយហ្គឺរ) ដែលមានកីឡាករប្រយុទ្ធដ៏ល្អមួយចំនួន ប៉ុន្តែនៅទីបញ្ចប់ខ្ញុំសប្បាយចិត្តដែលយើងអាចបង្កើតឱកាសបានច្រើនជាងពួកគេ។។»

«តាមពិតនៅក្នុងការប្រកួតលីគ វាគឺ ១ ឆ្នាំហើយ ចាប់តាំងពីការបរាជ័យលើកចុងក្រោយរបស់យើង ទល់នឹងបឹងកេត កាលពីថ្ងៃទី ០១ ខែសីហា ឆ្នាំ ២០២១។ ខ្ញុំសូមអរគុណដល់កីឡាកររបស់យើង ចំពោះការបង្ហាញពីភាពអាជីពរបស់គេក្នុងកម្រិតមួយដ៏ខ្ពស់ និងរក្សាស្ថិរភាពរបស់ពួកគេ។» គ្រូបង្វឹកសញ្ជាតិអៀរឡង់ខាងជើងរូបនេះបានបន្ថែមជុំវិញការមិនចាញ់ក្នុងលីគ។

ជ័យជម្នះនេះផងដែរ បានធ្វើឱ្យព្រះខ័នរាជស្វាយរៀង ឈរកំពូលតារាងនៃលីគ មាន ៣៥ ពិន្ទុ ហើយនាំមុខក្រុមលេខ ២ (ក្លិបបឹងកេត) ១២ ពិន្ទុ ដ្បិតសប្ដាហ៍ក្រោយ គឺជាការប្រកួតបញ្ចប់ជុំទី ២ មុននឹងបន្តការប្រកួតជុំទី ៣ ដើម្បីសម្រេចយក ៤ ក្រុមឡើងទៅប្រកួតជុំផ្ដាច់ព្រ័ត្រដណ្ដើមជើងឯក។

ប្រកួតបន្ទាប់ក្រុមមានមូលដ្ឋាននៅខេត្តស្វាយរៀងមួយនេះ នឹងត្រូវប្រកួតនៅរាជធានីភ្នំពេញ វិញម្ដងដោយត្រូវជួប ក្លិបវិសាខា នៅកីឡដ្ឋានខេត្តស្វាយរៀង នាថ្ងៃទី ០៦ ខែសីហា ឆ្នាំ ២០២២ វេលាម៉ោង ៦:៣០ នាទីល្ងាច៕

អត្ថបទ៖ មន្នីរ័ត្ន