កីឡា

ទោះចាញ់បឹងកេត ក៏ព្រះខ័នរាជស្វាយរៀងនៅតែបន្តនាំមុខ៦ពិន្ទុ

បានផុស

៤ years មុន

នៅ

ថ្ងៃចន្ទ ៣១ តុលា ២០២២

ដោយ

ក្លឹបបាល់ទាត់ព្រះខ័នរាជស្វាយរៀងនៅបន្តនាំមុខគូប្រជែងចំណាត់ថ្នាក់លេខ២វិសាខា ៦ពិន្ទុដដែល បើទោះជាបានចាញ់បឹងកេត នៅក្នុងការប្រកួតជើងទី១នៃវគ្គ៤ក្រុមចុងក្រោយ ខេមបូឌានព្រីមៀរលីគ២០២២។

ការប្រកួតធ្វើនៅទឹកដីបឹងកេតបាន៣៤នាទីកីឡាករព្រះខ័នរាជស្វាយរៀង Clyde O’connell តែតចូលទីបានសម្រេចដើម្បីនាំមុខ ១-០ នៅវគ្គទី១។ យ៉ាងណានៅវគ្គទី២ បឹងកេត ធ្វើបានយ៉ាងល្អតាមការការពារ និងវាយបក ក្នុងនោះកីឡាករ Zabihi Taher រកបានគ្រាប់បាល់តាមស្មើ ១-១ នៅនាទីទី៥៤ មុនពេលខ្សែប្រយុទ្ធលេចធ្លោ សៀង ចន្ធា ទទួលបានបាល់អូសដាច់ខ្សែការពារស៊ុតចូលបានសម្រេចនៅនាទីទី៦៤ដែលបានក្លាយជាគ្រាប់បាល់ជ័យជម្នះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជ័យជម្នះនេះផ្តល់ឲ្យ បឹងកេត ទទួលបាន៣ពិន្ទុបន្ថែមកាត់បន្ថយគម្លាយពិន្ទុពីក្រុមចំណាត់ថ្នាក់លេខ៣ភ្នំពេញក្រោន ១ពិន្ទុ ក្រុមលេខ២វិសាខា២ពិន្ទុ និងមានគម្លាតពីក្រុមកំពូលតារាងព្រះខ័នរាជស្វាយរៀង៨ពិន្ទុ។

ទោះជាយ៉ាងណា ព្រះខ័នរាជស្វាយរៀងវិញនៅតែរក្សាបន្តនាំមុខ៦ពិន្ទុលើវិសាខាដដែល ដោយសារតែវិសាខាបានចាញ់ភ្នំពេញក្រោន ៤-៣។ កាលពីចប់ជុំទី៣ ព្រះខ័នរាជស្វាយរៀង ក៏នាំមុខគូប្រជែង៦ពិន្ទុដែរ។

អ្វីដែលគួរឲ្យកត់សំគាល់នោះគឺភ្នំពេញក្រោនហាក់ធ្វើបានខ្លាំងមែនទែនប្រមាណ៥ប្រកួតចុងក្រោយដោយមិនទាន់ស្គាល់បរាជ័យសោះ។ ក្រុមនេះក៏ឈ្នះសុទ្ធតែក្រុមខ្លាំងៗនៅលើកំពូលតារាងទាំង៤គឺឈ្នះ ព្រះខ័នរាជស្វាយរៀង ៣-០, ឈ្នះបឹងកេត ៣-០ និងឈ្នះវិសាខា ៤-៣។

ការប្រកួតបន្ទាប់ ព្រះខ័នរាជស្វាយរៀង ត្រូវជួប វិសាខា វេលាម៉ោង៦:៣០នាទីល្ងាច ថ្ងៃទី១២ ខែវិច្ឆិកា នៅកីឡដ្ឋានព្រីនស៍៕

អត្ថបទ៖ វីរបុត្រ