កម្ពុជាចុះសន្ធិសញ្ញាជាមួយបែលហ្ស៊ិកក្នុងការដោះដូរទណ្ឌិតរវាងប្រទេសទាំងពីរ

រាជរដ្ឋាភិបាលកម្ពុជា តាមរយៈក្រសួងយុត្តិធម៌ បានចុះហត្ថលេខាលើសន្ធិសញ្ញាស្តីពីការផ្ទេរទណ្ឌិតរវាងប្រទេសកម្ពុជា និងប្រទេសបែលហ្ស៊ិក ដែលនេះបានបង្ហាញពីការពង្រឹងពង្រីកនូវកិច្ចសហប្រតិបត្តិការផ្នែកច្បាប់រវាងប្រទេសទាំងពីរ។

សន្ធិសញ្ញានេះ ត្រូវបានចុះហត្ថលេខាកាលពីរសៀលថ្ងៃទី២៣ ខែមករា ឆ្នាំ២០២៦ ដោយរដ្ឋមន្ត្រីក្រសួងយុត្តិធម៌ លោកឧបនាយករដ្ឋមន្ត្រី កើត រិទ្ធ និងលោក Michel Parys ឯកអគ្គរាជទូតបែលហ្ស៊ិកប្រចាំកម្ពុជា ដែលមាននិវេសនដ្ឋាននៅទីក្រុងបាងកក។

តាមការឱ្យដឹងដោយក្រសួងយុត្តិធម៌ សន្ធិសញ្ញាស្តីពីការផ្ទេរទណ្ឌិតនេះ គឺជាក្របខ័ណ្ឌច្បាប់ដ៏មានសារៈសំខាន់មួយក្នុងកិច្ចសហប្រតិបត្តិការផ្នែកច្បាប់ក្នុងវិស័យព្រហ្មទណ្ឌ ដែលអនុញ្ញាតឱ្យមានការផ្ទេរទណ្ឌិតរវាងប្រទេសទាំងពីរទៅអនុវត្តទោសនៅប្រទេសកំណើតរបស់ខ្លួន សំដៅជំរុញឱ្យមានការសម្រេចបាននូវយុត្តិធម៌ និងការធ្វើសមាហរណកម្មទណ្ឌិតចូលទៅក្នុងសង្គមរបស់ខ្លួនវិញ។

ក្នុងជំនួបដែលធ្វើឡើងមុនពិធីចុះហត្ថលេខា នៅទីស្ដីការក្រសួងយុត្តិធម៌ លោកឧបនាយករដ្ឋមន្ត្រី កើត រិទ្ធ និងលោកឯកអគ្គរាជទូតបែលហ្ស៊ិក ក៏បានពិភាក្សាការងារអំពីគោលបំណង និងសារៈសំខាន់នៃការពង្រឹង និងពង្រីកកិច្ចសហប្រតិបត្តិការផ្នែកច្បាប់រវាងប្រទេសទាំងពីរឱ្យកាន់តែរឹងមាំ និងមានភាពជិតស្និទ្ធបន្ថែមទៀត៕