ថៃ កំពុងប្រឈមអត់មានស្ថានីយទូរទស្សន៍ទិញសិទ្ធិផ្សាយ AFF Cup 2022 ដើម្បីមើលការលើកពាន លើកទី ៧

ប្រជាជន​ថៃ កំពុង​រង់ចាំ​ដំណឹង​អំពី​ការ​បាន​ទស្សនា​ការ​ប្រកួត​របស់​ក្រុម​ជម្រើស​ជាតិ​ខ្លួន ប្រកួត​ក្នុង​ពានរង្វាន់​ឯក​អាស៊ាន (AFF Mitsubishi Electric Cup 2022)។

តម្លៃ នៃ​ការ​ទិញ​សិទ្ធិ​ចាក់​ផ្សាយ​ការ​ប្រកួត​ពានរង្វាន់​ជើងឯក​អាស៊ាន (AFF Mitsubishi Electric Cup 2022) ត្រូវ​បាន​កាត់បន្ថយ​ពី ២.៧៥ លាន​ដុល្លារ មក​នៅ​ត្រឹម ២ លាន​ដុល្លារ ប៉ុន្តែ​នៅតែ​គ្មាន​ប៉ុស្តិ៍​ទូរទស្សន៍​ថៃ​ណាមួយ ឈាន​ឆ្ពោះ​ទៅមុខ ដើម្បី​សម្រេច​កិច្ចព្រមព្រៀង​នោះ​ទេ។

ក្នុង​រយៈពេល​ជាង​មួយ​សប្ដាហ៍​ទៀត ព្រឹត្តិការណ៍ AFF Mitsubishi Electric Cup 2022 នឹង​ចាប់ផ្ដើម ប៉ុន្តែ​អ្នកគាំទ្រ​ក្រុម​ការពារ​តំណែង​ជើងឯក​ថៃ នៅតែ​ស្ថិត​ក្នុង​ហានិភ័យ​ក្នុង​ការ​ខកខាន​មើល​ការ​ប្រកួត​ប្រជែង​ដណ្ដើម​ពាន​លើក​ទី ៧ របស់​ពួកគេ។

ព័ត៌មាន​ចុងក្រោយ​ពី សារព័ត៌មាន BallThaiStand បង្ហាញថា សមាគម​បាល់ទាត់​ថៃ (FAT) បាន​ចរចា​ជាមួយ​សហព័ន្ធ​កីឡាបាល់ទាត់​អាស៊ាន ក្នុងតម្លៃ​ទាប ដើម្បី​ទិញ​សិទ្ធិ​ផ្សាយ AFF Cup។ តម្លៃ​សិទ្ធិ​ផ្សាយ​ដំបូង​ពី ២.៧៥ លាន​ដុល្លារ ត្រូវបាន​កាត់បន្ថយ​មក​ត្រឹម ២ លាន​ដុល្លារ។ យ៉ាងណាក៏ដោយ ក៏​នៅតែ​គ្មាន​ប៉ុស្តិ៍​ទូរទស្សន៍​ថៃ​ណា​ហ៊ាន​ទិញ​សិទ្ធិ​ពី Sport 5 ដែល​ទទួលបន្ទុក​កំណត់​តម្លៃ​នោះ​ទេ។

បញ្ជាក់​ថា ថៃ ស្ថិតនៅ​ពូល A ជាមួយ កម្ពុជា​, ហ្វីលីពីន​, ឥណ្ឌូណេស៊ី និង​ព្រុយ​ណេ។ គេ​នឹង​ចាប់​ផ្ដើម​ការពារ​ជើងឯក AFF នៅ​ថ្ងៃ​ទី ២០ ខែ​ធ្នូ ទល់នឹង​ប្រ៊ុយណេ នៅ​កីឡដ្ឋាន Cheras ក្នុង​ទីក្រុង Kuala Lumpur ប្រទេស​ម៉ាឡេស៊ី។ ខណៈ​ជួប​កម្ពុជា នៅ​ថ្ងៃ​ទី ០២ ខែ​មករា ឆ្នាំ ២០២៣ ខណៈ​បើ​គ្មាន​ការ​ផ្សាយ​បាន​សេចក្ដីថា សូម្បីតែ​ប្រជាជន​ដែល​រស់នៅ​ក្នុង​ប្រទេស​ថៃ ក៏​មិន​អាច​ទស្សនា​តាម​ទូរទស្សន៍​បាន​ដែរ លើកលែងតែ​ទៅ​ចូលរួម​ទស្សនា​ផ្ទាល់៕

ប្រភព ៖ mainstand.co.th

អត្ថបទ ៖ មន្នីរ័ត្ន