តស់! មកស្គាល់ទាំងអស់គ្នា អំពីក្លិប Al Nassr​ ដែលជាទ្រនំថ្មីរបស់ Ronaldo

សករាជថ្មីនៃអាជីពបាល់ទាត់របស់ Cristiano Ronaldo បានចាប់ផ្តើមហើយ បន្ទាប់ពីរូបគេចុះហត្ថលេខាជាមួយក្លិបអារ៉ាប៊ីសាអូឌីត Al Nassr។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រទី៣០ខែធ្នូ Ronaldo បានចុះហត្ថលេខាលើកិច្ចសន្យាតម្លៃមហាសាល រហូតដល់ខែមិថុនាឆ្នាំ២០២៥។

ចុះតើអ្នកស្គាល់ក្លិប Al Nassr ដែរឬទេ?

បង្កើតឡើងក្នុងឆ្នាំ១៩៥៥ ក្លិប Al Nassr មានមូលដ្ឋាននៅរាជធានី​ រីយ៉ាដ របស់ប្រទេសអារ៉ាប៊ីសាអូឌីត ហើយជាក្រុមមួយក្នុងចំណោមក្រុមទាំង១៨ ដែលប្រកួតប្រជែងក្នុងក្របខ័ណ្ឌអារ៉ាប៊ីសាអូឌីត Pro League (SPL)។ សព្វថ្ងៃក្លិបនេះ មានម្ចាស់ឈ្មោះ Musalli Al-Muammar។ គាត់គឺជាអតីតប្រធានក្របខ័ណ្ឌ SPL។

ក្លិបនេះបានបញ្ចប់នៅចំណាត់ថ្នាក់លេខ៣ ក្នុងលីគកាលពីរដូវកាលមុន ហើយបានឈ្នះជើងឯក SPL ចំនួន៩សម័យ ដោយពានរង្វាន់ចុងក្រោយបំផុតរបស់ពួកគេ គឺក្នុងរដូវកាល ២០១៨-១៩។

ទោះ​បី​ជាយ៉ាងណាក៏ដោយ ​គូ​ប្រជែងរបស់​ Al Nassr គឺក្លិប Al Hilal គឺជាក្លិប​ដែល​មានជោគជ័យជាង​គេ​ក្នុង​ប្រវត្តិសាស្ត្រ​របស់​អារ៉ាប៊ីសាអូឌីត ពោលគឺពួកគេ​បាន​ឈ្នះជើងឯក SPL ១៨សម័យ។

ក្លិប Al Nassr ក៏បានឈ្នះពានរង្វាន់ដ៏មានកិត្យានុភាពបំផុតរបស់ប្រទេសគឺ King’s Cup ចំនួន៦សម័យផងដែរ ប៉ុន្តែការឈ្នះលើកចុងក្រោយបំផុតគឺកាលពីឆ្នាំ១៩៩០ឯណោះ។

ពួក​គេ​ធ្លាប់បាន​លេខ​ពីរ​ក្នុងពានរង្វាន់ប្រចាំ​ទ្វីប​អាស៊ី AFC Champions League ក្នុង​ឆ្នាំ១៩៩៥។

បច្ចុប្បន្នក្លិប Al Nassr ស្ថិតក្រោមការដឹកនាំរបស់បុរសសញ្ជាតិបារាំង លោក Rudi Garcia។ អ្នកចាត់ការទូទៅវ័យ៥៨ឆ្នាំរូបនេះ បានចូលដឹកនាំ Al Nassr ក្នុងឆ្នាំ២០២២ បន្ទាប់ពីមានបទពិសោធន៍ដឹកនាំជោកជាំឲ្យក្លិបបារាំងដូចជា Lille, Marseille និង Lyon។ លោកក៏ធ្លាប់ចំណាយពេល៣ឆ្នាំ ដឹកនាំក្រុម Roma ក្នុងក្របខ័ណ្ឌអ៊ីតាលី Serie A ផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ ដឹងហើយ ថ្ងៃដែល Ronaldo ចូលលេងប្រកួតដំបូងឲ្យក្លិប Al Nassr