កីឡា

គ្រូ វៀតណាម និយាយយ៉ាងស្រួលថា ជើងទី២ ស៊ី ថៃ តែ ១-០ ក្លាយជាជើងឯក AFF Cup ហើយ

បានផុស

១ year មុន

នៅ

ថ្ងៃសៅរ៍ ១៤ មករា ២០២៣

ដោយ

គ្រូបង្វឹកវៀតណាមលោក Park Hang-seo បានប្រាប់អ្នកគាំទ្រកុំឲ្យមានការព្រួយបារម្ភ បន្ទាប់ពីប្រកួតស្មើ ២-២ ជាមួយថៃក្នុងវគ្គផ្តាច់ព្រ័ត្រ AFF Mitsubishi Electric Cup កាលពីយប់ថ្ងៃសុក្រ ហើយលោកបាននិយាយថា “យើងរកតែ ១ គ្រាប់ប៉ុណ្ណោះនឹងក្លាយជាជើងឯកហើយ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Park បាននិយាយនៅក្នុងសន្និសីទសារព័ត៌មានក្រោយការប្រកួតជាមួយថៃថា “ពិតណាស់ ២-២ មិនមែនជាលទ្ធផលដ៏ល្អសម្រាប់វៀតណាម នៅមុនការប្រកួតជើងទី ២ ក្នុងប្រទេសថៃនោះទេ ដោយសារតែច្បាប់នៃគ្រាប់បាល់ក្រៅដី ។ ថៃមានប្រៀប ប៉ុន្តែមិនមែនមានន័យថា យើងចាញ់នោះទេ យើងនឹងរកបានជ័យជម្នះនៅប្រទេសថៃ” ។

ទន្ទឹមនោះ គ្រូបង្វឹកវ័យ ៦៦ ឆ្នាំរូបនេះក៏បានសុំទោសអ្នកគាំទ្រដែលមិនអាចរកបានជ័យជម្នះក្នុងការប្រកួតក្នុងទឹកដីលើកចុងក្រោយរបស់លោកក្នុងនាមជាគ្រូបង្វឹកក្រុមជម្រើសជាតិ បន្ទាប់ពីកិច្ចសន្យារបស់លោកនឹងផុតនៅថ្ងៃទី ៣០ ខែមករា នេះហើយ ។

លោក Park បានបន្ថែមថា “ខ្ញុំចង់អរគុណដល់កីឡាករទាំងអស់ ពួកគេបានព្យាយាមរហូតដល់នាទីចុងក្រោយ ដោយសារតែពួកគេចង់ឈ្នះពេក ដូច្នេះសម្ពាធតែងតែកើតមានឡើងហើយ ។ ពិតណាស់ គ្មានកីឡាករណាម្នាក់ល្អឥតខ្ចោះនោះទេ ហើយយើងត្រូវតែកែលម្អរឿងនេះឡើងវិញផងដែរ”។

គួរបញ្ជាក់ថា ជាមួយនឹងលទ្ធផលស្មើ ២-២ ក្នុងជើងទី១ នេះ វៀតណាមត្រូវការឈ្នះថៃ ឬស្មើ ៣-៣ ក្នុងជើងទី២ ដើម្បីលើកពាន AFF Mitsubishi Electric Cup ឆ្នាំ២០២២ ៕