អ្នកជំនួញអារ៉ាប៊ីសាអូឌីត ដេញថ្លៃកញ្ចប់ទស្សនា ២.២ លានផោន ដើម្បីជួប Ronaldo និង Messi

អ្នកជំនួញជនជាតិអារ៉ាប៊ីសាអូឌីតម្នាក់កំពុងនាំមុខលើការដេញថ្លៃកញ្ចប់ដើម្បីទស្សនា ការប្រកួតដែលអាចនិយាយបានថា​ទំព័រចុងក្រោយបង្អស់ ក្នុងការប្រកួតប្រជែងរវាង Cristiano Ronaldo និង Lionel Messi ជាមួយនឹងការផ្តល់ជូនតម្លៃ ២.២លានផោន សម្រាប់សំបុត្រចូលទស្សនាការប្រកួតមិត្តភាពនៅថ្ងៃព្រហស្បតិ៍ខាងមុខនេះ។

អង្គភាពកម្សាន្តរបស់រដ្ឋាភិបាលអារ៉ាប៊ីសាអូឌីត បាននិយាយនៅលើ Twitter ថា Mushref al-Ghamdi អ្នកគ្រប់គ្រងទូទៅនៃក្រុមហ៊ុនអចលនទ្រព្យ AqarOne គឺជាអ្នកនាំមុខក្នុងការដេញថ្លៃដែលបញ្ចប់នៅថ្ងៃអង្គារ។ សំបុត្រមានឈ្មោះ​ថា “Beyond Imagination” គឺសម្រាប់ការប្រកួតដែលមានក្រុមចម្រុះមកពីក្លិបអារ៉ាប៊ីសាអូឌីត Al Nassr ដែលទើបចុះហត្ថលេខាលើ Ronaldo និងក្លិប Al Hilal ទល់ជាមួយនឹងក្លិប Paris Saint-Germain របស់ Messi។

អ្នកទិញសំបុត្រមានសិទ្ធិចូលទីលានដើម្បីអបអរការលើកពាន និងចូលទៅក្នុងបន្ទប់ផ្លាស់សំលៀកបំពាក់ហើយជួបបុរសទាំង ២នាក់ ដែលធ្លាប់ប្រជែងគ្នាជាច្រើនឆ្នាំមកហើយ។

ការប្រកួតនៅទីក្រុង Riyadh នឹងក្លាយជាជំនួបនៅលើទីលានលើកដំបូងរបស់អ្នកទាំងនេះ ចាប់តាំងពី Juventus យកឈ្នះ Barcelona ៣-០ ក្នុងខែធ្នូ ឆ្នាំ២០២០។

ទោះបីជាប្រាក់ចំណូលពីការដេញថ្លៃគឺដើម្បីទៅអង្គការសប្បុរសធម៌ក៏ដោយ ព្រឹត្តិការណ៍នេះអាចជំរុញឱ្យមានការចោទប្រកាន់ពី “ការលាងលុយក្នុងកីឡា”៖ បង្វែរការយកចិត្តទុកដាក់ពីការរំលោភសិទ្ធិដោយការចាយលុយលើកីឡា។

ក៏ដូចជាទាក់ទាញ Ronaldo អារ៉ាប៊ីសាអូឌីត ក៏បានចុះហត្ថលេខាលើ Messi ជាឯកអគ្គរាជទូតទេសចរណ៍ ខណៈ PSG ជាកម្មសិទ្ធិរបស់រដ្ឋាភិបាលកាតា៕

ប្រភព៖ theguardian.com
អត្ថបទ៖ មន្នីរ័ត្ន