កីឡា

សហព័ន្ធកីឡាជនពិការអាស៊ានអរគុណកម្ពុជាដែលបានរៀបចំរត់ភ្លើងគប់នៅថៃ

បានផុស

៣ years មុន

នៅ

ថ្ងៃអង្គារ ១៨ មេសា ២០២៣

ដោយ

ពិធីដង្ហែព្រះអគ្គិជ័យកីឡា និងរត់ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានរៀបចំនៅប្រទេសថៃកាលពីថ្ងៃទី១៧ ខែមេសា ដែលមានមន្ត្រីជាន់ខ្ពស់ និងអត្តពលិកថៃចូលរួមយ៉ាងច្រើនកុះករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីរត់ភ្លើងគប់លើចម្ងាយផ្លូវជាង៣គីឡូម៉ែត្រកាលពីរសៀលថ្ងៃទី១៧ ខែមេសា ត្រូវបានរៀបចំនៅពហុកីឡដ្ឋានជាតិថៃ Rajamangala ដែលមានអ្នកចូលរួមប្រមាណ៤០០នាក់ ក្នុងនោះភាគច្រើនជាអត្តពលិកជម្រើសជាតិថៃ និងមន្ត្រីជាន់ខ្ពស់ផ្នែកកីឡារបស់ថៃទាំងកីឡាអូឡាំពិក និងកីឡាជនពិការ។

លោកស្រី Wandee Tosuwan អគ្គលេខាធិការសហព័ន្ធកីឡាជនពិការអាស៊ីអាគ្នេយ៍ (APSF) បានអរគុណដល់កម្ពុជាដែលបានរៀបចំពិធីដង្ហែភ្លើងគប់នៅប្រទេសថៃ។ លោកស្រីមានប្រសាសន៍ថា ៖«សូមអរគុណជាពិសេសដល់គណៈកម្មាធិការជាតិរៀបចំការប្រកួតកីឡាស៊ីហ្គេម(CAMSOC) និងគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេម (CAMAPGOC) របស់កម្ពុជាសម្រាប់ការរៀបចំពិធីរត់ភ្លើងគប់នៅប្រទេសថៃ។ សូមអរគុណដល់អត្តពលិកជម្រើសជាតិថៃទាំងអស់ដែលបានចូលរួមរត់ភ្លើងគប់ថ្ងៃនេះ។ សូមអរគុណដល់លោក យី វាសនា អគ្គលេខាធិការរង CAMAPGOC ដែលបានជួយសម្រួលដល់យើងខ្ញុំសម្រាប់ការរៀបចំរត់ភ្លើងគប់ថ្ងៃនេះ»។

ជាមួយគ្នានេះ លោកឧត្តមសេនីយ៍ Vitch Davahasdin អគ្គលេខាធិការគណៈកម្មាធិការជាតិអូឡាំពិកថៃ បាននិយាយថា ពិធីដង្ហែព្រះអគ្គិជ័យកីឡានៅប្រទេសថៃគឺមិនត្រឹមតែជាកិច្ចសហប្រតិបត្តិការទៅវិញទៅមកក្នុងការចូលរួម និងការគាំទ្រប្រទេសកម្ពុជាជាម្ចាស់ផ្ទះប៉ុណ្ណោះទេ ប៉ុន្តែក៏បានបង្ហាញឱ្យឃើញពីការត្រៀមខ្លួនរបស់ប្រទេសថៃ ក្នុងការបញ្ជូនអត្តពលិកចូលរួមប្រកួត ក៏ដូចជាផ្សព្វផ្សាយ និងជំរុញឱ្យប្រជាជនថៃបានដឹង និងចូលរួមតាមដាន ព្រមទាំងផ្ញើការលើកទឹកចិត្តដល់ក្រុមអត្តពលិកថៃ។ កីឡាបង្កើតនូវសុខភាពល្អជូនប្រជាជន និងជួយឱ្យមានការត្រៀមខ្លួននៅក្នុងការប្រកួតផងដែរ។

ក្នុងពិធីនេះ ដឹកនាំដោយលោក ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេសតំណាង CAMSOC, លោកបណ្ឌិត Gongsak Yodmani អភិបាលនៃអាជ្ញាធរកីឡាថៃ, លោក ហ៊ុន សារឿន ឯកអគ្គរាជទូតកម្ពុជាប្រចាំព្រះរាជាណាចក្រថៃ, លោក Dato’ Seri Chaiyapak Sriwat អនុប្រធានគណៈកម្មាធិការជាតិអូឡាំពិកថៃ និងជាប្រធានប្រតិបត្តិសហព័ន្ធកីឡអាស៊ីអាគ្នេយ៍, លោកឧត្តមសេនីយ៍ទោ Osoth Bhavilia ប្រធានសហព័ន្ធកីឡាជនពិការអាស៊ីអាគ្នេយ៍, លោកឧត្តមសេនីយ៍ Vitch Davahasdin អគ្គលេខាធិការគណៈកម្មាធិការជាតិអូឡាំពិកថៃ, វីរសេនីយ៍ Naiyanobh Bhirombhakdi ប្រធានគណៈកម្មាធិការជាតិប៉ារ៉ាឡាំពិកថៃ និងភ្ញៀវកិត្តិយស អត្តពលិកថៃ ប្រមាណជិត៤០០នាក់៕