កីឡា

៤ខែទៀត ខាន់ ចេសា នឹងតំណាងឲ្យកម្ពុជាចូលរួមប្រកួតកីឡាទ្វីបអាស៊ីនៅចិន

បានផុស

១០ ខែ មុន

នៅ

ថ្ងៃសុក្រ ២៦ ឧសភា ២០២៣

ដោយ

វីរកីឡាការិនីជឺជីតស៊ូជម្រើសជាតិកម្ពុជា ខាន់ ចេសា នឹងវិលត្រឡប់មកប្រទេសកម្ពុជាវិញនាប៉ុន្មានខែខាងមុខដើម្បីតំណាងឲ្យកម្ពុជាសម្រាប់ការចូលរួមប្រកួតកីឡាទ្វីបអាស៊ី ឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាទ្វីបអាស៊ី (Asian Games) លើកទី១៩ ដើមឡើយគ្រោងធ្វើនៅឆ្នាំ២០២២ ប៉ុន្តែដោយសារវិបត្តិកូវីដ-១៩ ម្ចាស់ផ្ទះចិនបានពន្យារពេលមករៀបចំការប្រកួតចាប់ពីថ្ងៃទី២៣ ខែកញ្ញា ដល់ថ្ងៃទី៨ ខែតុលា ឆ្នាំ២០២៣ នៅខេត្ត Hangzhou។

មហាព្រឹត្តិការណ៍កីឡាធំលើកទី១៩នេះត្រូវបានដាក់កីឡាចំនួន៤០ប្រភេទ និងមានវិញ្ញាសាប្រមាណ៤៨២ដើម្បីឲ្យប្រកួតប្រជែងមេដាយ។ ក្នុងនោះកីឡាជឺជីតស៊ូក៏ត្រូវបានដាក់បញ្ជូលឲ្យប្រកួតប្រជែងជាផ្លូវការ ខណៈកម្ពុជាក៏គ្រោងនឹងបញ្ជូនអត្តពលិកកីឡាជឺជីតស៊ូចូលរួមប្រកួតដែរ។

វីរកីឡាការិនី ខាន់ ចេសា ត្រូវការពារតំណែងមេដាយមាសកីឡាទ្វីបអាស៊ីរបស់ខ្លួនដែលបានឈ្នះកាលពីឆ្នាំ២០១៨ នៅប្រទេសឥណ្ឌូណេស៊ី។ បន្ទាប់ពីជោគជ័យក្នុងកីឡាស៊ីហ្គេម លើកទី៣២ នៅកម្ពុជា កីឡាការិនីរូបនេះបានប្រាប់ថា ៖«ឃើញប្រជាជនកម្ពុជាស្រឡាញ់គាំទ្រ ខ្ញុំច្រើនយ៉ាងនេះ ខ្ញុំពិតជាសប្បាយរីករាយជាងអ្វីដែលខ្ញុំបានឈ្នះមេដាយថែមទៀត។ ខ្ញុំពិតជាមានមោទនភាព និងរំភើបរីករាយខ្លាំងណាស់»។

«ឥឡូវនេះ ខ្ញុំត្រូវត្រឡប់ទៅសហរដ្ឋអាមេរិកវិញ ហើយខ្ញុំនឹងចូលរួមការប្រកួតព្រឹត្តិការណ៍អន្តរជាតិមួយទៀត។ បន្ទាប់មក ខ្ញុំនឹងត្រឡប់មកកម្ពុជាវិញដើម្បីចូលរួមប្រកួតកីឡាទ្វីបអាស៊ី»។ ខាន់ ចេសា បានបញ្ជាក់។

សូមបញ្ជាក់ថា ខាន់ ចេសា ជាអត្តពលិកម្នាក់ក្នុងចំណោមអត្តពលិកកម្ពុជាតែ៣នាក់ប៉ុណ្ណោះដែលបានឈ្នះមេដាយមាសពីកីឡាទ្វីបអាស៊ី បន្ទាប់ពីវីរកីឡាការិនី ស៊ន សៀវម៉ី បានឈ្នះមេដាយមាសកាលពីឆ្នាំ២០១៤ នៅកូរ៉េខាងត្បូង និងវីរកីឡាករម៉ូតូទឹក សាលី អ៊ូម៉ើត បានឈ្នះមេដាយមាសកាលពីឆ្នាំ២០១៨នៅប្រទេសឥណ្ឌូណេស៊ី។

ការចូលរួមប្រកួតកីឡាទ្វីបអាស៊ី លើកទី១៩ ឆ្នាំ២០២៣ ខាងមុខនេះ មានន័យថា ខាន់ ចេសា នឹងតំណាងឲ្យកម្ពុជាជាលើកទី២សម្រាប់ការចូលរួមប្រកួតកីឡាកម្រិតអាស៊ី ខណៈវីរកីឡាការិនីរូបនេះធ្លាប់ចូលរួមប្រកួតកីឡាស៊ីហ្គេមពីរលើកហើយគឺឆ្នាំ២០១៩ និង២០២៣៕