កីឡា

ព្រឹកស្អែក ក្រុមបាល់បោះរទេះនារីកម្ពុជាប្រកួតដណ្តើមមេដាយមាសជាមួយថៃ

បានផុស

៣ years មុន

នៅ

ថ្ងៃសុក្រ ២ មិថុនា ២០២៣

ដោយ

ការប្រកួតបាល់បោះរទេះពិការវិញ្ញាសា៣ទល់៣ទាំងបុរស និងនារីបានបញ្ចប់ការប្រកួតវគ្គសន្សំពិន្ទុ និងរកឃើញក្រុមឡើងវគ្គផ្តាច់ព្រ័ត្រដណ្តើមមេដាយមាសហើយក្នុងព្រឹត្តិការណ៍កីឡាជនពិការអាស៊ីអាគ្នេយ៍ លើកទី១២ ដែលប្រកួតនៅថ្ងៃទី២ ខែមិថុនា ឆ្នាំ២០២៣នេះ។

វិញ្ញាសានារី៣ទល់៣

ក្រុមបាល់បោះរទេះពិការនារីកម្ពុជាបានឡើងទៅកាន់វគ្គផ្តាច់ព្រ័ត្រដំណ្តើមមេដាយមាស សម្រាប់វិញ្ញាសា៣ទល់៣ ដោយត្រូវជួបនឹងក្រុមខ្លាំងថៃ។ នៅវគ្គសន្សំពិន្ទុ បើកឆាក ក្រុមនារីម្ចាស់ផ្ទះកម្ពុជាបានចាញ់នារីថៃដោយលទ្ធផល ៧-១០ ប៉ុន្តែការប្រកួតលើកទី២ និងទី៣ ក្រុមនារីកម្ពុជាធ្វើបានល្អខ្លាំងមែនទែនដោយបានយកឈ្នះក្រុមនារីហ្វីលីពីន ១៤-០ និងឈ្នះក្រុមនារីឡាវ ១៦-១។ ចំណែកក្រុមនារីថៃឈ្នះទាំង៣ប្រកួតសម្រាប់វគ្គសន្សំពិន្ទុគឺឈ្នះម្ចាស់ផ្ទះកម្ពុជា ៧-១០, ឈ្នះឡាវ ១-១០ និងឈ្នះហ្វីលីពីន ២-១៧ ដើម្បីឈរលើកំពូលតារាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូច្នេះការប្រកួតវគ្គផ្តាច់ព្រ័ត្រក្រុមនារីកម្ពុជាត្រូវជួបក្រុមខ្លាំងថៃដើម្បីប្រជែងមេដាយមាស ខណៈក្រុមនារីហ្វីលីពីនត្រូវប្រកួតជាមួយក្រុមនារីឡាវដើម្បីដណ្តើមមេដាយសំរិទ្ធ។ សូមបញ្ជាក់ថា ក្រុមបាល់បោះរទេះពិការនារីកម្ពុជាត្រូវការពារតំណែងមេដាយមាសវិញ្ញាសា៣ទល់៣នេះ បន្ទាប់ពីបានឈ្នះកាលពីឆ្នាំ២០២២ នៅប្រទេសឥណ្ឌូណេស៊ី ហើយនៅវគ្គផ្តាច់ព្រ័ត្រកាលនោះក្រុមនារីកម្ពុជាក៏ជួបថៃដូចឆ្នាំ២០២៣នេះដែរ។

វិញ្ញាសាបុរស៣ទល់៣

វិញ្ញាសាបាល់បោះរទេះបុរស៣ទល់៣មាន៥ប្រទេសគឺម្ចាស់ផ្ទះកម្ពុជា ថៃ ឥណ្ឌូណេស៊ី ម៉ាឡេស៊ី និង ហ្វីលីពីន។ ការប្រកួតវគ្គសន្សំពិន្ទុ ក្រុមម្ចាស់ផ្ទះកម្ពុជាបានចាញ់៣ប្រកួត និងឈ្នះ១ប្រកួតគឺចាញ់ថៃ ៨-១៥, ចាញ់ហ្វីលីពីន ៥-១៤, ចាញ់ម៉ាឡេស៊ី ៦-១២ និងចុងក្រោយឈ្នះឥណ្ឌូណេស៊ី ១០-៩។

ដូច្នេះក្រុមកម្ពុជាអស់ឱកាសប្រកួតដណ្តើមមេដាយមាសហើយ ប៉ុន្តែត្រូវប្រកួតដណ្តើមមេដាយសំរិទ្ធជាមួយម៉ាឡេស៊ី ខណៈក្រុមថៃត្រូវប្រកួតជាមួយហ្វីលីពីនដើម្បីដណ្តើមមេដាយមាស។

ការប្រកួតវគ្គផ្តាច់ព្រ័ត្រទាំងវិញ្ញាសាបុរស៣ទល់៣ និងនារី៣ទល់៣ ត្រូវធ្វើឡើងចាប់ពីម៉ោង៩ព្រឹករហូតដល់ម៉ោង១០ព្រឹក ថ្ងៃទី៣ ខែមិថុនា ស្អែកនេះ៕

អត្ថបទ៖ វីរបុត្រ

Related Topics:អាស៊ានប៉ារ៉ាហ្គេម ២០២៣