អតីត​សមាជិក​ Man City ម្នាក់​ប្រាប់​​ឲ្យ Hotspur លក់ខ្សែប្រយុទ្ធ Harry Kane​ ចេញ

ក្លិប ​Tottenham Hotspur គួរតែលក់ខ្សែប្រយុទ្ធ Harry Kane ចេញដើម្បីយកទឹកប្រាក់នោះផ្តល់ឱកាសឱ្យគ្រូបង្វឹកថ្មី​គឺលោក​ Ange Postecoglou រៀបចំក្រុមឡើងវិញ។ នេះ​​ជា​ការ​លើក​ឡើង​របស់​លោក Micah Richards អតីតខ្សែការពាររបស់ក្លិប Man City ។

លោក Micah Richards បាន​និយាយ​ថា៖«ប្រសិនបើ Kane បន្តស្នាក់នៅ Spurs នៅរដូវក្តៅនេះ​ទៀតនោះ គាត់នឹងអាចចាកចេញនៅចុងរដូវកាលឆ្នាំ២០២៣-២០២៤ លើការផ្ទេរដោយគ្មានតម្លៃខ្លួន»។

ប្រធានក្រុមជម្រើសជាតិអង់គ្លេស Harry Kane  វ័យ ២៩ ឆ្នាំជាអ្នកស៊ុតបញ្ចូលទីច្រើនជាងគេក្នុងប្រវតិ្តសាស្រ្តក្លិបមាន់ខ្នាយមាស Tottenham Hotspur ដោយរកបាន ២៨០ គ្រាប់ ហើយបានក្លាយជាអ្នកស៊ុតបញ្ចូលទីច្រើនជាងគេរបស់របស់ក្លិបក្នុងរយៈពេល ៩ រដូវកាលកន្លងមកនេះ។

លោក Richards បានបន្ថែមថា ៖«Harry Kane ចង់ក្លាយជាអ្នកស៊ុតបញ្ចូលច្រើនជាងគេនៅក្នុងប្រវិត្តសាស្រ្តរបស់ក្របខណ្ឌ Premier League។​ ប៉ុន្តែប្រសិនបើគាត់ផ្លាស់ទៅ Real Madrid ហើយឈ្នះពានរង្វាន់ Champions League ទៀត វាពិតជារឿង​ដ៏​អស្ចារ្យមួយ។ បើបានឈ្នះពានរង្វាន់ La Liga ​ទៀតនោះ គាត់នឹង​ទទួល​បាន​ជោគជ័យមួយកម្រិតថែមទៀត» ។

ចុងក្រោយលោក Micah Richards​ នៅតែយល់ឃើញថា ការលក់ខ្សែប្រយុទ្ធ Harry Kane​ ចេញមុនពេលកុងត្រា​ផុតកំណត់នៅចុងរដូវកាលឆ្នាំ​ ២០២៣-២០២៤ ​គឺ​ជាជម្រើសល្អបំផុតសម្រាប់ក្លិបTottenham Hotspur។ លោកក៏ចង់ឲ្យ​ខ្សែប្រយុទ្ធ Harry Kane ផ្លាស់ទៅក្លិបអភិរាជស Real Madrid ខណៈ​តារាឆ្នើមរបស់ក្លិប Real Madrid គឺកីឡាករ Karim Benzema បានផ្លាស់ចេញទៅក្លិបថ្មីផងដែរ៕

ប្រែ​សម្រួល៖ ផា រតនា
ប្រភព៖ BBC