កីឡា

វ៉ិត ចន្ថា បំបែកកំណត់ត្រាចាស់ និងជាកីឡាការិនីពិការខ្មែរទី១ឈ្នះមេដាយមាស៣គ្រឿងអាស៊ានប៉ារ៉ាហ្គេម

បានផុស

៣ ខែ មុន

នៅ

ថ្ងៃពុធ ៧ មិថុនា ២០២៣

ដោយ

កីឡាការិនីអត្តពលិកកម្មពិការឆ្នើម វ៉ិត ចន្ថា បានឈ្នះមេដាយមាស៣គ្រឿងសម្រាប់វិញ្ញាសាទាំង៣ដែលអ្នកស្រីប្រកួតក្នុងព្រឹត្តិការណ៍កីឡាជនពិការអាស៊ីអាគ្នេយ៍ លើកទី១២ ឆ្នាំ២០២៣ នៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វ៉ិត ចន្ថា បានឈ្នះមេដាយមាសទី១សម្រាប់វិញ្ញាសាលោតចម្ងាយ មេដាយមាសទី២លើវិញ្ញាសារត់ចម្ងាយ៤០០ម៉ែត្រ និងមេដាយមាសទី៣លើវិញ្ញាសារត់ចម្ងាយ២០០ម៉ែត្រ។ លទ្ធផលនេះមានន័យថា កីឡាករិនីរូបនេះធ្វើបានល្អឥតខ្ចោះ១០០%សម្រាប់វិញ្ញាសាទាំង៣ដែលអ្នកស្រីប្រកួតក្នុងអាស៊ានប៉ារ៉ាហ្គេម លើកទី១២ ដែលកម្ពុជាធ្វើជាម្ចាស់ផ្ទះ។

វ៉ិត ចន្ថា ជាកីឡាការិនីពិការកម្ពុជាដំបូងគេដែលបានឈ្នះមេដាយមាស២គ្រឿង និងប្រាក់១គ្រឿងពីព្រឹត្តិការណ៍កីឡាជនពិការលើកទី១១ ឆ្នាំ២០២២ នៅប្រទេសឥណ្ឌូណេស៊ី ប៉ុន្តែពេលនេះអ្នកស្រីបានបំបែកកំណត់ត្រាចាស់របស់ខ្លួនក្នុងការឈ្នះមេដាយមាសដល់ទៅ៣គ្រឿង និងបានក្លាយជាកីឡាការិនីពិការកម្ពុជាដំបូងគេក្នុងការឈ្នះមេដាយមាស៣គ្រឿងក្នុងកីឡាអាស៊ានប៉ារ៉ាហ្គេមតែមួយ ហើយក៏ជាអត្តពលិកពិការកម្ពុជាទី២ដែលបានឈ្នះមេដាយមាស៣គ្រឿងក្នុងពេលតែមួយ បន្ទាប់ពីកីឡាករពិការ វ៉ាន វ៉ុន ឈ្នះមេដាយមាស៣គ្រឿងកាលអាស៊ានប៉ារ៉ាហ្គេម ឆ្នាំ២០១៤។

រហូតដល់ពេលនេះ កម្ពុជាក្នុងនាមជាម្ចាស់ផ្ទះទទួលបានមេដាយមាស៦គ្រឿងហើយគឺ វ៉ិត ចន្ថា រកបាន៣គ្រឿង ក្រុមកីឡាការិនីបាល់បោះកម្ពុជា៣ទល់៣រកបាន១គ្រឿង កីឡាការិនីពិការ ងួន រតនា រកបាន១គ្រឿង និងកីឡាការិនីពិការ យិន សូត រកបាន១គ្រឿង៕