កីឡា

កម្ពុជាឡើងដល់ចំណាត់ថ្នាក់ល្អបំផុតស្មើអាស៊ានប៉ារ៉ាហ្គេមឆ្នាំ២០២២

បានផុស

៣ ខែ មុន

នៅ

ថ្ងៃពុធ ៧ មិថុនា ២០២៣

ដោយ

កម្ពុជាបានឡើងទៅឈរលេខ៧ដែលជាចំណាត់ថ្នាក់ល្អបំផុតក្នុងព្រឹត្តិការណ៍កីឡាអាស៊ានប៉ារ៉ាហ្គេម បន្ទាប់ពីបានឈ្នះមេដាយមាស៦គ្រឿងក្នុងអាស៊ានប៉ារ៉ាហ្គេម លើកទី១២ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមម៉ោង៨ ព្រឹកថ្ងៃពុធ ទី៧ ខែមិថុនានេះ កម្ពុជាក្នុងនាមជាម្ចាស់ផ្ទះរកបានមេដាយសរុប៤៣គ្រឿងហើតគឺមេដាយមាស៦ ប្រាក់១២ និងសំរិទ្ធ២៥ ដើម្បីឡើងទៅកាន់ចំណាត់ថ្នាក់លេខ៧នៃតារាងមេដាយក្នុងចំណៅមប្រទេសទាំង១១។

ការឈរចំណាត់ថ្នាក់លេខ៧នេះគឺជាចំណាត់ថ្នាក់ល្អបំផុតក្នុងប្រវត្តិសាស្ត្ររបស់ខ្លួនដែលកម្ពុជាធ្លាប់ធ្វើបានក្នុងអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូណេស៊ី ដែលពេលនោះកម្ពុជារកបានមេដាយសរុប២៨គ្រឿងគឺមាស៧ ប្រាក់១០ និងសំរិទ្ធ១១ ប៉ុន្តែបើគិតមេដាយសរុបក្នុងកីឡាអាស៊ានប៉ារ៉ាហ្គេម ឆ្នាំ២០២៣នេះ កម្ពុជារកបានច្រើនជាងកាលពីឆ្នាំ២០២២។

រហូតដល់ពេលនេះ នៅមានប្រភេទកីឡាខ្លះទៀតដែលកម្ពុជាអាចរកបានមេដាយមាសបន្ថែមទៀតដូចជាបាល់ទះអង្គុយជាដើម ខណៈការប្រកួតក៏មិនទាន់ចប់ពោលគឺនៅសល់រយៈពេល២ថ្ងៃទៀតទៀត។

គិតត្រឹមព្រឹកថ្ងៃពុធ ទី៧ ខែមិថុនានេះ ឥណ្ឌូណេស៊ី ឈរលើកំពូលតារាងមេដាយក្នុងនោះមាស៩៩ ប្រាក់៨៣ និងសំរិទ្ធ៥៤ ខណៈថៃឈរលេខ២ជាមួយមេដាយមាស៧៧ ប្រាក់៧២ និងសំរិទ្ធ៤៨ ហើយវៀតណាមឈរលេខ៣ដោយមានមេដាយមាស៣៦ ប្រាក់៣៧ និងសំរិទ្ធ៥៦។ ម៉ាឡេស៊ីឈរលេខ៤ដោយមានមេដាយមាស៣៣ ប្រាក់២៧ និងសំរិទ្ធ២៧ ហើយសិង្ហបុរីលេខ៦ជាមួយមេដាយមាស៧ ប្រាក់១៣ និងសំរិទ្ធ១១។ ប្រទេសនៅក្រោមកម្ពុជាគឺមីយ៉ាន់ម៉ា ព្រុយណេ ទីម័រខាងកើត និងឡាវ៕