កីឡា

អាស៊ានប៉ារ៉ាហ្គេម២០២៣ កម្ពុជាបានមេដាយច្រើនជាង តែចំណាត់ថ្នាក់ទាបជាង២០២២

បានផុស

២ years មុន

នៅ

ថ្ងៃសុក្រ ៩ មិថុនា ២០២៣

ដោយ

ការប្រកួតកីឡាគ្រប់ប្រភេទក្នុងអាស៊ានប៉ារ៉ាហ្គេម លើកទី១២ បានបញ្ចប់ទាំងស្រុងត្រឹមព្រឹកថ្ងៃទី៩ ខែមិថុនា បន្ទាប់ពីចាប់ផ្តើមការប្រកួតជាផ្លូវការកាលពីថ្ងៃទី៣ ខែមិថុនា ឆ្នាំ២០២៣។

ជាលទ្ធផលបង្ហាញថា កម្ពុជាទទួលបានមេដាយសរុបចំនួន៧០គ្រឿងគឺមាស៩ ប្រាក់១៨ និងសំរិទ្ធ៤៣ ដែលជាចំនួនមេដាយច្រើនបំផុតជាលើកដំបូងទាំងមាស ប្រាក់ និងសំរិទ្ធ បើប្រៀបធៀបនឹងចំនួនមេដាយអាស៊ានប៉ារ៉ាហ្គេម តាំងពីលើកទី១ដល់លើកទី១១ ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណា កម្ពុជាស្ថិតនៅចំណាត់ថ្នាក់លេខ៨ក្នុងចំណោមប្រទេសអាស៊ាន១១។ កម្ពុជានៅលើប្រទេសព្រុយណេ ទីម័រខាងកើត និងឡាវ ខណៈឥណ្ឌូណេស៊ីលេខ១ ថៃលេខ២ វៀតណាមលេខ៣ ម៉ាឡេស៊ីលេខ៤ ហ្វីលីពីនលេខ៥ មីយ៉ាន់ម៉ាលេខ៦ និងសិង្ហបុរីលេខ៧។ ស្ថិតនៅលេខ៨គឺទាបជាងឆ្នាំ២០២២ដែលកម្ពុជាបានឡើងដល់លេខ៧ជាចំណាត់ថ្នាក់ល្អបំផុតក្នុងប្រវត្តិសាស្ត្ររបស់ខ្លួន ប៉ុន្តែពេលនោះកម្ពុជាទទួលបានមេដាយ២៨គ្រឿងប៉ុណ្ណោះគឺមាស៧ ប្រាក់១០ និងសំរិទ្ធ១១។

មូលហេតុដែលកម្ពុជាទទួលបានមេដាយច្រើន តែចំណាត់ថ្នាក់ទាបជាងឆ្នាំ២០២២អាចមកពមានវិញ្ញាសាច្រើន ហើយសមត្ថភាពរបស់អត្តពលិកពិការកម្ពុជានៅមានកម្រិត។ អាស៊ានប៉ារ៉ាហ្គេម លើកទី១២ នៅកម្ពុជាដាក់កីឡាប្រកួតផ្លូវការ១៣ប្រភេទ និងកីឡាសម្តែង១ប្រភេទ ប៉ុន្តែមានចំនួន១៣៦៦វិញ្ញាសា (មាស៤៧៥ ប្រាក់៤៤៨ និងសំរិទ្ធ៤៤៣) ធៀបនឹងឆ្នាំ២០២២ មានកីឡា១៤ប្រភេទ មាន១២២២វិញ្ញាសា (មាស៤៥៥ ប្រាក់៤០៤ និងសំរិទ្ធ៣៦៣)។

ដូច្នេះអត្តពលិករបស់ប្រទេសនីមួយៗមានឱកាសបង្កើនចំនួនមេដាយ ជាពិសេសប្រទេសដែលមានគុណភាពខ្ពស់ កាន់តែឈានមុខគេក្នុងការទទួលបានមេដាយ។ ជាក់ស្តែង ប្រទេសសិង្ហបុរី ដាក់អត្តពលិកតែ២៦នាក់ប៉ុណ្ណោះ ប៉ុន្តែទទួលបានមេដាយ៤៤គ្រឿងគឺមាស១២ ប្រាក់១៥ និងសំរិទ្ធ ១៧ ឈរលេខ៧ពីលើកម្ពុជាដែលបានដាក់អត្តពលិក២៥២នាក់។

ដោយឡែក ឥណ្ឌូណេស៊ី ទទួលបានមេដាយសរុប៤០១គ្រឿងគឺមាស១៥៩ ប្រាក់១៤៨ និងសំរិទ្ធ៩៤ ដូច្នេះថយចុះច្រើន បើប្រៀបធៀបនឹងឆ្នាំ២០២២ បានមេដាយសរុប៤២៦គ្រឿងគឺមាស១៧៥ ប្រាក់១៤៤ និងសំរិទ្ធ១០៧។ ការថយចុះរបស់ឥណ្ឌូណេស៊ី និងមានវិញ្ញាសាច្រើនក៏ជាកត្តាធ្វើប្រទេសថៃ វៀតណាម ម៉ាឡេស៊ី ហ្វីលីពីន មីយ៉ាន់ម៉ា សិង្ហបុរី និងម្ចាស់ផ្ទះកម្ពុជាកើនឡើងចំនួនមេដាយ៕