កីឡា

ប្រុសស្អាត Nick Taylor នឹងបង្ហាញខ្លួនលើកទី២ប៉ះបង់ក្លាដែសយប់នេះ

បានផុស

៣ years មុន

នៅ

ថ្ងៃព្រហស្បតិ៍ ១៥ មិថុនា ២០២៣

ដោយ

កីឡាករបាល់ទាត់ខ្មែរ-អាមេរិក Nick Taylor នឹងបង្ហាញខ្លួនលើកទី២ទល់នឹងក្រុមជម្រើសជាតិបង់ក្លាដែស សម្រាប់ការប្រកួតមិត្តភាពអន្តរជាតិរបស់ម្ចាស់ផ្ទះកម្ពុជាវេលាម៉ោង៧យប់នេះនៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Nick Taylor ត្រូវបានកោះហៅចូលរួមជម្រើសជាតិកម្ពុជាកាលពីខែកញ្ញា ឆ្នាំ២០២២ និងបានបង្ហាញលើកដំបូងឲ្យក្រុមបាល់ទាត់ជម្រើសជាតិកម្ពុជានៅពេលប្រកួតមិត្តភាពអន្តរជាតិជាមួយបង់ក្លាដែស នៅថ្ងៃទី២៣ ខែកញ្ញា ឆ្នាំ២០២២ នៅពហុកីឡដ្ឋានជាតិមរតកតេជោ។

បន្ទាប់មក កីឡាកររូបសង្ហានេះត្រូវបានកោះហៅចូលជម្រើសជាតិកម្ពុជាដើម្បីប្រកួតជើងឯកអាស៊ីអាគ្នេយ៍ (AFF Championship) ដែលរូបគេទទួលបានឱកាសបង្ហាញខ្លួនលើទីលាន៥ដង ក្នុងនោះរកបានគ្រាប់បាល់លើកដំបូងតាមរយៈការស៊ុតប៉េណាល់ទីនៅពេលកម្ពុជាបានឈ្នះព្រុយណេដោយលទ្ធផល ៥-១ នៅថ្ងៃទី២៩ ខែធ្នូ ឆ្នាំ២០២២។

ក្រោយចប់ពានរង្វាន់ AFF Championship កីឡាករដែលកំពុងជោគជ័យលើការផ្សាយពាណិជ្ជកម្មនេះមិនបានវិលត្រឡប់ទៅសហរដ្ឋអាមេរិកវិញទេដោយបានចុះកុងត្រាចូលរួមជាមួយក្លិបព្រះខ័នរាជស្វាយរៀង។ រូបគេរកបានគ្រាប់បាល់ជាច្រើនក្នុងពានរង្វាន់ Cambodian League Cup កាលពីប៉ុន្មានខែកន្លងទៅនេះ។

ពេលនេះកីឡាករកើតនៅសហរដ្ឋអាមេរិក និងមានម្តាយជាជនខ្មែរត្រូវបានកោះហៅចូលជម្រើសជាតិជាថ្មីសម្រាប់ការប្រកួតមិត្តភាពជាមួយជម្រើសជាតិបង់ក្លាដែសដែលជាលើកទី២សម្រាប់ខ្លួនតទល់នឹងក្រុមជម្រើសជាតិមួយនេះ។

តាមរយៈបច្ចេកទេសលេងមួយប៉ះបានល្អ និងលេងលឿនៗ Nick Taylor អាចនឹងចាប់ដៃគូជាមួយកីឡាករវ័យក្មេងលេចធ្លោ សៀង ចន្ធា និង លឹម ពិសិដ្ឋ ខណៈ ចាន់ វឌ្ឍនាកា អាចជាជម្រើសដូរចូលចុងម៉ោងសម្រាប់ប្រយុទ្ធជួរមុខ៕