កីឡា

ការហ្វឹកហាត់ខ្លាំងនៅកាតារធ្វើឲ្យ សៀង ចន្ធា កាន់រឹងមាំជាងមុន

បានផុស

២ ខែ មុន

នៅ

ថ្ងៃអង្គារ ១២ កញ្ញា ២០២៣

ដោយ

ខ្សែប្រយុទ្ធកីឡាករ សៀង ចន្ធា បន្ទាប់ពីជួយក្រុមជម្រើសកម្ពុជា២ប្រកួតក្នុងជំនួប FIFA Days ត្រូវធ្វើដំណើរទៅប្រទេសកាតារនៅថ្ងៃទី១២ ខែកញ្ញានេះដើម្បីជួយក្រុមក្នុងពានរង្វាន់ Qatar FA Cup នៅថ្ងៃទី១៤ ខែកញ្ញា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាកររូបនេះធ្វើការធ្ងន់មែនទែន ក្នុងការបង្ហាញឲ្យជម្រើស១១ដំបូងទាំង២ប្រកួត។ រូបគេរកបាន២គ្រាប់ ជួយឲ្យកកម្ពុជាឈ្នះម៉ាកាវ ៤-០។ អ្វីដែលគួរឲ្យចាប់អារម្មណ៍នោះ រូបគេលេងកាន់តែល្អប្រសើរ និងកម្លាំងស៊ុហ្វខ្លាំងជាងពេលនៅប្រទេសកម្ពុជា។

ការហ្វឹកហាត់នៅប្រទេសកាតារខ្លាំងរហូតធ្វើឲ្យរូបគេស្រកទម្ងន់អស់៥គីឡូក្រាម បូកបន្ថែមទាំងមិនទាន់ទម្លាប់នឹងអាហារ និងរបៀបរស់នៅក្នុងប្រទេសកាតារផង។ ទោះបីជាយ៉ាងណា ការប្រឹងប្រែងនៅប្រទេសកាតារបានធ្វើឲ្យរូបគេកាន់តែរឹងមាំ។

សៀង ចន្ធា បាននិយាយថា៖«សម្រាប់ការហ្វឹកហាត់នៅកាតារគឺខ្ញុំហ្វឹកហាត់ខ្លាំង។ សម្រាប់ទម្រង់លេងរបស់ក្លិបគឺត្រូវដាក់សម្ពោធលើគូប្រកួត ឆ្លងកាត់ពី១ប្រកួតទៅ១ប្រកួត ខ្ញុំត្រូវលេងបែបនេះរហូត។ នេះហើយជាហេតុផលដែលធ្វើឲ្យកម្លាំងរបស់ខ្ញុំកើនឡើងជាមុន»។

នេះជាផលវិជ្ជមានមួយក្រោយការផ្លាស់ទៅលេងនៅក្រៅប្រទេស ដែលធ្វើឲ្យកីឡាករកម្ពុជាទទួលបានការហ្វឹកហាត់និងបច្ចេកទេសបន្ថែមទៀតដើម្បីអភិវឌ្ឍខ្លួនឲ្យកាន់តែល្អប្រសើរហើយជាពិសេសធ្វើឲ្យកីឡាករ សៀង ចន្ធា កាន់តែរឹងមាំមួយកម្រិតទៀត។

ក្លិប Al Shahaniya SC នឹងត្រូវជួបក្លិប Mesimeer នៅថ្ងៃទី១៤ ខែកញ្ញានេះ សម្រាប់ការប្រកួតទី២ វគ្គសន្សំពិន្ទុពូល A ពានរង្វាន់ Qatar FA Cup ។ បច្ចុប្បន្នក្លិបនេះឈរលេខ ១ក្នុងពូល A មាន ៣ពិន្ទុក្រោយយកឈ្នះក្លិប Muaither sc ក្នុងលទ្ធផល ៧-០ កាលពីថ្ងៃទី ៣ ខែកញ្ញា ឆ្នាំ ២០២៣ ក្នុងនោះកីឡាករ សៀង ចន្ធា ក៏រកបាន ១គ្រាប់ដែរ៕