កីឡា

សហព័ន្ធបំភ្លឺជុំវិញ ខាន់ ចេសា មិនចូលរួមប្រកួតកីឡាអាស៊ីនៅចិន

បានផុស

៩ ខែ មុន

នៅ

ថ្ងៃអង្គារ ១៩ កញ្ញា ២០២៣

ដោយ

សហព័ន្ធកីឡាជឺជីតស៊ូកម្ពុជាបានចេញសេចក្តីបំភ្លឺជុំវិញករណីវីរកីឡាការិនី ខាន់ ចេសា មិនបានចូលរួមប្រកួតកីឡាអាស៊ី លើកទី១៩ ឆ្នាំ២០២៣ នៅប្រទេសចិន។

សហព័ន្ធបានបង្ហាញថា ខ្លួនមិនជាប់ពាក់ព័ន្ធនឹងការសម្រេចចិត្តរបស់កីឡាការិនី ខាន់ ចេសា ទេ ហើយសហព័ន្ធគោរពលើការសម្រេចចិត្តនេះ។ សហព័ន្ធនៅតែរក្សាទំនាក់ទំនងជិតស្និទ្ធជាមួយកីឡាការិនីខ្មែរ-អាមេរិកប្រកបដោយវិជ្ជាជីវៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការគ្រោងទុក សហព័ន្ធកីឡាជឺជីតស៊ូកម្ពុជា នឹងបញ្ជូនអត្តពលិករបស់ខ្លួន២រូបគឺកីឡាការិនី ខាន់ ចេសា ប្រកួតលើវិញ្ញាសា Ne-Waza ទម្ងន់ក្រោម៥២គីឡូក្រាម និងកីឡាករ មឿនលីម សុបញ្ញា ប្រកួតវិញ្ញាសា Ne-Waza ទម្ងន់៦៩គីឡូក្រាម។ ដូច្នេះមានតែកីឡាករ សុបញ្ញា ម្នាក់ទៅប្រកួតកីឡាអាស៊ីនៅចិនសម្រាប់កីឡាជឺជីតស៊ូ។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងថា វីរកីឡាការិនី ខាន់ ចេសា មិនបានចូលរួមជាមួយក្រុមជម្រើសជាតិកម្ពុជាទៅប្រកួតកីឡាទ្វីបអាស៊ី លើកទី១៩ ឆ្នាំ២០២៣ នៅប្រទេសចិនទេ។ កត្តាបណ្តាលឲ្យអវត្តមាននេះ គឺជាបញ្ហាផ្ទាល់ខ្លួន និងជាប់ភារកិច្ចប្រកួតដណ្តើមខ្សែក្រវាត់ពិភពលោកនៅ ONE Championship នៅថ្ងៃទី២៩ ខែកញ្ញា។

វីរកីឡាការិនី ខាន់ ចេសា ដែលជាក្តីសង្ឃឹមរបស់កម្ពុជាក្នុងស្វែងរកមេដាយជូនជាតិត្រូវការពារតំណែងមេដាយមាសរបស់ខ្លួនដែលបានឈ្នះក្នុងកីឡាអាស៊ី ឆ្នាំ២០១៩ ប៉ុន្តែពេលនេះនាងមិនអាចការពារបានទេ។

នៅថ្ងៃទី២៩ ខែកញ្ញាខាងមុខនេះ ខាន់ ចេសា តំណាងឲ្យកម្ពុជានឹងប្រកួតដណ្តើមខ្សែក្រវាត់ពិភពលោកនៅសង្វៀន ONE Championship លើជំនាញឃ្លេ នៅប្រទេសសិង្ហបុរី៕