គ្រូទ័ពថា ក្រោយឈ្នះបឹងកេត មានក្តីបារម្ភធំសម្រាប់ការប្រកួតសប្តាហ៍ក្រោយ

ជំនួបសប្ដាហ៍ទី៦ ខេមបូឌានព្រីមៀរលីគ ក្លិបក្រសួងការពារជាតិបានយកឈ្នះក្លិបបឹងកេត ដោយលទ្ធផល ៣-៤ នៅពហុកីឡដ្ឋានជាតិអូឡាំពិក​ ទោះបីមានបញ្ហាភ្លៀងខ្លាំង ប៉ុន្តែក្រុមទាំង២បានខិតខំប្រឹងប្រែងដើម្បីប្រជែងយកជ័យជម្នះរៀង​ៗ​ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្នីសទីសារព័ត៌មាន ក្រោយបញ្ចប់ការប្រកួតក្នុងសប្តាហ៍ទី៦ គ្រូបង្វឹកក្រសួងការពារជាតិ លោក ភា សុភ័ត្រ្តា និយាយថា៖«សម្រាប់ខ្ញុំហាក់បាត់បង់កម្លាំងចិត្តបន្ថិច នៅពេលបឹងកេតបាននាំមុខ។ ស្ថានភាពកីឡាកររបស់ខ្ញុំ មានការរមួលក្រពើ របួសច្រើន។ ជាក់ស្តែងក្នុងការប្រកួត យើងមានបញ្ហារបួសច្រើនដូចជាខ្សែប្រយុទ្ធ​ប្រេស៊ីល Lucas Massaro, កីឡាករជប៉ុន Toshiya ជាពិសេសកីឡាករ ញាណ សុស៊ីដាន។ បញ្ហាទាំងនេះកើតឡើងបណ្តាលមកពីកត្តាអាកាសធាតុ។ មូលហេតុគឺកីឡាករត្រូវប្រើកម្លាំងខ្លាំងនៅពេលទីលានមានទឹក​»។

នេះក៏ក្តីកង្វល់ធំមួយសម្រាប់​គ្រូបង្វឹក​ក្រសួងការពារជាតិសម្រាប់​ការ​ត្រៀម​ខ្លួន​ប្រកួត​​សប្តាហ៍ទី៧ ខេមបូឌានព្រីមៀរលីគ នាថ្ងៃសៅរ៍ ទី៣០ ខែកញ្ញា ឆ្នាំ២០២៣ ជា​មួយ​ក្លិបវិសាខា។

ការប្រកួតរវាង​បឹងកេត និង​ក្រសួងការពារជាតិគឺជាការប្រកួតដ៏ជក់ចិត្តមួយ ទោះបី​ជា​​មានភ្លៀងខ្លាំងធ្លាក់ក៏ដោយ ប៉ុន្តែក្រុមទាំង២នៅតែសម្រុក​គ្នា​ខ្លាំង​ទៅ​វិញ​ទៅ​មក។ លោក ភា សុភ័ត្រ្តា បានបន្ថែមថា​​​​​​​៖«សម្រាប់ការប្រកួតនេះ អ្វីដែលខ្ញុំសោកស្តាយបំផុតគឺកត្តាអាកាសធាតុធ្វើឲ្យយើងមិន​អាច​ប្រើប្រាស់បច្ចេកទេសលេងបានល្អ ប៉ុន្តែ​ចំណុចមួយដែលខ្ញុំមើលឃើញរបស់ក្រុមទាំង២គឺការប្រឹងប្រែង​ខ្លាំង​ដោយ​ឆន្ទៈមុះមុត»៕

អត្ថបទ៖ រតនា