លោក ភា សុភ័ត្រ្តា លើកពីបញ្ហាតំបន់ប្រយុទ្ធរបស់វិសាខា

ក្នុងជំនួបសប្ដាហ៍ទី៧ ពានរង្វាន់ខេមបូឌានព្រីមៀរលីគ ក្រុមភ្លៀវក្រសួងការពារជាតិត្រូវ​ប្រកួត​ក្រុមម្ចាស់ផ្ទះវិសាខា នៅកីឡដ្ឋានព្រីនស៍ វេលាម៉ោង ៦ល្ងាច ថ្ងៃទី៣០ ខែកញ្ញា ឆ្នាំ២០២៣។

ក្នុងសន្នីសទីសារព័ត៌មានមុនការប្រកួត លោក ភា សុភ័ត្រ្តា គ្រូបង្វឹកក្រសួងការពារជាតិ បាននិយាយថា ៖«ខ្ញុំអាច​នឹង​លើកថយបន្ថិចនៅពេល​វិសាខាមានខ្សែប្រយុទ្ធ Haber ហាក់ដូចជាផ្ទុយពីគេបន្ដិច។ នៅពេល​ពួកគេមានកីឡាករខ្ពស់ ប៉ុន្តែពួកគេ​បែរ​ជា​មិនសូវលេងបាល់ខ្ពស់ឬលើកទៅវិញ។ នេះក៏ជាហេតុមួយនៅពេលក្រុមមានខ្សែប្រយុទ្ធខ្ពស់ហើយមានគុណភាពបែរ​ជា​មិនសូវលេងបាល់លើទៅវិញ»។

«បើនិយាយពីខ្សែប្រយុទ្ធបច្ចុប្បន្នគឺកីឡាករ Jonata។ គាត់ព្យាយាមលេង និងធ្វើចលនាដើម្បីរកបាល់ដោយខ្លួនឯងច្រើន។ ជាហេតុ​ធ្វើឲ្យគាត់ពិបាកក្នុងការរក្សាកម្លាំង និង​ស្វែងរកឱកាសគ្រាប់​បាល់។ Jonata ត្រូវការអ្នកបង្កើតឱកាសឲ្យគាត់ដើម្បីរកគ្រាប់បាល់»។ លោក ភា សុភក្ត្រា បញ្ជាក់។

បើក្រឡែកមើល​២ប្រកួតចុងក្រោយរបស់​វិសខាគឺធ្វើមិនបានល្អទេ។ ពួក​គេ​បាន​ចាញ់ទាំង២ប្រកួតនៅក្នុងដីខ្លួនឯងនិងមិនអាចរកគ្រាប់បាល់​បានទេ។​ ទោះបីជាបញ្ហាក្នុងតំបន់ប្រយុទ្ធបន្ថិចបន្ថួច ចំពោះការប្រកួត២លើកចុងក្រោយមែន ប៉ុន្តែ​វិសាខានៅតែជាក្រុមដ៏គ្រោះថ្នាក់​សម្រាប់​ក្រសួងការពារជាតិល្ងាច​នេះ។

លោក ភា សុភ័ត្រ្តា បានបន្ថែមថា ៖«ទោះបីលទ្ធផល៣ប្រកួត​ចុង​ក្រោយ​របស់វិសាខា ធ្វើមិនបានល្អមែន ​តែ​ពួកគេជាក្រុមមួយដ៏គ្រោះថ្នាក់មួយ។ ពួកគេមានគ្រូដែលមានបទពិសោធ និងកីឡាករល្អៗច្រើន។ កីឡាករក្នុងស្រុកមួយចំនួនសុទ្ធតែជាប់ជម្រើសជាតិទៀត។ នេះជាក្តីបារម្ភរបស់ខ្ញុំនៅតែពេល​ជួប​វិសាខាពេលល្ងាចនេះ»។

អត្ថបទ៖ ផា រតនា