កីឡា

ចាប់ផ្តើមរដូវកាលដំបូង Ryo Fujii ក្លាយជាតួសំខាន់បម្រើការពាររបស់ព្រះខ័នរាជស្វាយរៀង

បានផុស

៣ years មុន

នៅ

ថ្ងៃសៅរ៍ ២៨ តុលា ២០២៣

ដោយ

កីឡាករ Ryo Fujii ក្លាយជាតួអង្គសំខាន់មួយក្នុងតំបន់បម្រើការពារ ក្រោយចាប់ផ្តើមជាមួយក្លិបព្រះខ័នរាជស្វាយរៀងបាន៨សប្ដាហ៍ក្នុងពានរង្វាន់ខេមបូឌានព្រីមៀរលីគរដូវកាល ២០២៣-២៤។

ព្រះខ័នរាជស្វាយរៀងបានប្រកាសជាផ្លូវការកាលពីថ្ងៃទី២៤ ខែកក្ដដា ឆ្នាំ២០២៣ ក្នុងការនាំយកខ្សែបម្រើការពារកីឡាករ Ryo Fujii ជនជាតិជប៉ុន ដើម្បីពង្រឹងតំបន់កណ្ដាលក្នុងការប្រកួតប្រជែងពានរង្វាន់ផ្សេងៗក្នុងរដូវកាលឆ្នាំ២០២៣-២៤។

ឆ្លងកាត់ការប្រកួត៨សប្ដាហ៍ក្នុងលីគកន្លងមក កីឡាករ Ryo Fujii ពិតជាកម្លាំងគាទ្រដ៏សំខាន់ដែលលោកគ្រូ Pep Muñoz ពេញចិត្តយ៉ាងខ្លាំងជាមួយទម្រង់របស់កីឡាកររូបនេះ។ Ryo បានរូមចំណែកជួយឲ្យព្រះខ័នរាជស្វាយរៀងទទួលបានជ័យជម្នះ៨ប្រកួតជាប់គ្នា និងរបូតគ្រាប់បាល់ត្រឹម៨គ្រាប់ប៉ុណ្ណោះ ក្នុងពានរង្វាន់ខេមបូឌានព្រីមៀរលីគ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Ryo Fujii ភាគច្រើនស្ថិតក្នុងជម្រើសដំបូងក្រោមការដឹកនាំរបស់លោក Pep Muñoz ជនជាតិអេស្ប៉ាញដោយសារខ្សែបម្រើការពារវ័យ២៧ឆ្នាំ រូបនេះមានភាពវ័យឆ្លាតរួមផ្សំទាំងការបត់បែនលឿននៅលើទីលាន និងការលេងយល់ចិត្តគ្នាជាមួយមិត្តរួមក្រុម។ រូបគេបានបង្ហាញខ្លួនឲ្យព្រះខ័នរាជស្វាយរៀងបាន៧លើកក្នុងចំណោម៨ប្រកួត និងស៊ុតបញ្ចូលទី១គ្រាប់។

មុនពេលចូលរួមជាមួយព្រះខ័នរាជស្វាយរៀង Ryo Fujii ធ្លាប់លេងឲ្យក្លិប៥ផ្សេងគ្នា ក្នុងនោះលេងឲ្យ LA Galaxy II នៅលីគទី២ សហរដ្ឋអាមេរិក, ឆ្នាំ២០១៨ លេងនៅក្លិប Nyköpings នៅលីគទី៣ ប្រទេសស៊ុយអែត, ឆ្នាំ២០២០ លេងនៅក្លិប Global នៅលីគកំពូលហ្វីលីពីន, ឆ្នាំ២០២១-២០២២ លេងនៅក្លិប Kaya FC និងឆ្នាំ២០២៣ លេងនៅក្លិប PSIS Semarang នៅលីគកំពូលឥណ្ឌូណេស៊ី៕