កីឡា

សមាគមបាល់ទាត់ជប៉ុនបញ្ជាក់ថា មិនបានដឹងរឿង លោក Saito មកធ្វើជា CEO នៅលីគកម្ពុជា

បានផុស

៣ years មុន

នៅ

ថ្ងៃចន្ទ ៦ វិច្ឆិកា ២០២៣

ដោយ

លោក Tashima Kohzo ប្រធានសមាគមកីឡាបាល់ទាត់ជប៉ុន (JFA) មិនបានដឹងរឿងលោក Saito Satoshi មកធ្វើការជានាយកប្រតិបត្តិ (CEO) របស់ក្រុមហ៊ុនលីគបាល់ទាត់កម្ពុជា (CPL) ទេ បន្ទាប់ពីបុរសជប៉ុនរូបនេះមិនត្រូវបានបន្តកុងត្រាកាលពីដាច់ខែតុលា ឆ្នាំ២០២៣។

លោក Kohzo បានលើកឡើងថា ៖«ខ្ញុំសូមជម្រាបឯកឧត្តម (សៅ សុខា) យើងមិនបានដឹងជាមុនទេថា គាត់បានមកកាន់តំណែងនៅកម្ពុជានោះទេ។ ថ្មីៗនេះ មានការជូនដំណឹងរបស់យើងថា ពេលនេះលោក Saito កំពុងផ្តល់ពាក្យ ឬដំបូន្មានដល់ផ្នែកបច្ចេកទេស។ ជាការពិត យើងនឹងកែតម្រូវ នៅពេលដែលគ្រូបង្វឹករបស់យើងត្រូវការធ្វើបច្ចុប្បន្នភាពដែលត្រូវពិភាក្សាជាមួយឯកឧត្តម ខៀវ សាម៉េត លោក កែវ សារ៉េត និងលោក រ៉ានាថ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសមាគមបាល់ទាត់ជប៉ុនបានបញ្ជាក់ថា តាមពិតលោក Saito ធ្លាប់ធ្វើការនៅ JFA និងសហព័ន្ធកីឡាបាល់ទាត់អាស៊ី (AFC) ផ្នែកទីផ្សារ ហើយមិនធ្លាប់ធ្វើកិច្ចការពាក់ព័ន្ធនឹងបច្ចេកទេសឡើយពីមុន។ គាត់មិនធ្លាប់បានសម្រេចលទ្ធផលការងារអ្វីនៅពេលធ្វើការជាមួយ AFC ឡើយ ហើយ AFC បានបញ្ចប់កុងត្រារបស់គាត់។

លោក Kohzo បានសង្កត់ធ្ងន់ថា ៖«ខ្ញុំមានការភ្ញាក់ផ្អើលជាខ្លាំងផងដែរដែលដឹងថា គាត់បានទទួលការគាំទ្រពី JFA ប៉ុន្តែដូចខ្ញុំបានជម្រាបខាងដើម យើងមិនបានដឹងទាល់តែសោះថា គាត់ទៅធ្វើការនៅកម្ពុជា ដូច្នេះគាត់មិនបានទទួលការគាំទ្រពី JFA នោះទេ»។

សូមបញ្ជាក់ថា Saito Satoshi ត្រូវបានក្រុមហ៊ុនលីគបាល់ទាត់កម្ពុជាបញ្ចប់កុងត្រាត្រឹមបំណាច់ឆ្នាំ២០២៣ ប៉ុន្តែលោកបានចាកចេញត្រឹមដាច់ខែតុលាកន្លងទៅនេះ បន្ទាប់ពីត្រូវបានតែងតាំងជានាយកប្រតិបត្តិកាលពីឆ្នាំ២០២១។

តាមសេចក្តីប្រកាសតែងតាំងរបស់សហព័ន្ធកីឡាបាល់ទាត់កម្ពុជាកាលពីថ្ងៃទី១៤ ខែតុលា ឆ្នាំ២០២១ បានបង្ហាញថា Saito ធ្លាប់ជាអ្នកគ្រប់គ្រងផ្នែកទីផ្សារនៅក្លិបបាល់ទាត់ FC Barcelona ធ្លាប់ជាអនុប្រធានការិយាល័យបេសកកម្មពិសេសរបស់សមាគមកីឡាបាល់ទាត់ជប៉ុន (JFA) ជានាយកទីផ្សារនៅសហព័ន្ធកីឡាបាល់ទាត់អាស៊ី (AFC) និងជាទីប្រឹក្សារបស់សហព័ន្ធកីឡាបាល់ទាត់ពិភពលោក (FIFA)។

ទោះបីជាយ៉ាងណា ក្នុងរយៈពេលជាង២ឆ្នាំកន្លងទៅ លីគបាល់ទាត់កំពូលកម្ពុជាក៏មានការីកចម្រើនគួរឲ្យចាប់អារម្មណ៍ ប៉ុន្តែគោលដៅរកប្រាក់ចំណូលឲ្យបាន៣លានដុល្លារក្នុងមួយរដូវកាលមិនបានសម្រេចទេ ខណៈលោកទទួលបានប្រាក់ខែរាប់ម៉ឺនដុល្លារអាមេរិក៕