U17 ឥណ្ឌូណេស៊ី សល់ឱកាសប្រជែងឡើងទៅវគ្គ១៦ក្រុម World Cup U17

ក្រុមបាល់ទាត់ជម្រើសជាតិឥណ្ឌូណេស៊ីអាយុក្រោម១៧ឆ្នាំ ធ្វើបានល្អក្នុងការប្រកួត២លើក វគ្គសន្សំពិន្ទុ ពានរង្វាន់បាល់ទាត់ពិភពលោកឆ្នាំ២០២៣ ដោយមិនចាញ់សោះ និងមាន​ឱកាស​បន្តក្តីសម្រៃឆ្លងដល់វគ្គ១៦ក្រុមចុងក្រោយ។

ក្រុមជម្រើសជាតិឥណ្ឌូណេស៊ីស្ថិតក្នុងពូល A រួមមាន​ក្រុមជម្រើសជាតិអេក្វាឌ័រ ម៉ារ៉ុក និង ប៉ាណាម៉ា។ ឆ្លងកាត់ការប្រកួតវគ្គសន្សំពិន្ទុក្នុងពូល២លើក ក្រុមជម្រើសជាតិឥណ្ឌូណេស៊ី ​បាន​​ស្មើជាមួយក្រុមអេក្វាឌ័រក្នុងលទ្ធផល ១-១ កាលពីថ្ងៃទី១០​ ខែវិច្ឆិកា ឆ្នាំ២០២៣ និងស្មើជាមួយក្រុមណាម៉ា ១-១​ នៅកាលពីថ្ងៃទី១៣ ខែវិច្ឆិកា ឆ្នាំ២០២៣។

បច្ចុប្បន្នក្រុម​ឥណ្ឌូណេស៊ី កំពុងឈរនៅលេខ៣ ក្នុងពូល A ដោយមាន២ពិន្ទុ។ សម្រាប់ការប្រកួតចុងក្រោយក្រុមឥណ្ឌូណេស៊ីនឹងត្រូវធ្វើការធ្ងន់ ជាមួយក្រុមម៉ារ៉ុកដែលជាក្រុមខ្លាំងកំពុងឈរលេខ២ ក្នុងពូល។ ក្រុមឥណ្ឌូណេស៊ីត្រូវការឈ្នះជាចាំបាច់ដើម្បីធានាកៅអីឡើងទៅវគ្គ១៦ក្រុមចុងក្រោយ ខណៈបើស្មើក្រុមឥណ្ឌូណេស៊ីក៏អាចមានឱកាស​ឡើងដែរក្នុងនាមជាក្រុមលេខ៣ ល្អក្នុងពូល តែត្រូវរង់ចាំមើលការប្រកួតរវាងក្រុមអេក្វាឌ័រ និងប៉ាណាម៉ាសិន ជាពិសេសត្រូវរងចាំមើលលទ្ធផលក្រុមលេខ៣ ក្នុងពូលទាំង៦ទៀត។

ការប្រកួតពានពិភពលោកឆ្នាំ២០២៣ យុវជនអាយុក្រោម២៣ឆ្នាំ បែងចែកជាមួយ៦ពូល និងមានក្រុមចូលរួមចំនួន២៤ សម្រាប់ក្រុមដែលឈរលេខ១ និងលេខ២ក្នុងពូលនីមួយៗមានឱកាស​ឡើងទៅវគ្គបន្តដោយស្វ័យប្រវតិ្ត ខណៈក្រុមលេខ៣ប្រចាំពូលទាំង៦ នឹងត្រូវជ្រើសរើសយកក្រុមល្អចំនួន៤ ដើម្បីឡើងទៅវគ្គ១៦ក្រុមចុងក្រោយ៕

អត្ថបទ៖ ផា រតនា